Isang buwan lang pagkatapos ipanganak ni Sheree ang baby nila ng kanyang boyfriend na si Gian Magdangal, halos walang bakas na nabuntis pala ang sexy actress.
Bago magtapos ang SOP last Sunday, June 8, ay nakita ng PEP (Philippine Entertainment Portal) si Sheree na dumating para puntahan si Gian, na regular performer ng Sunday musical-variety show ng GMA-7.
Ayon kay Sheree, hindi raw pala talaga madali ang maging isang magulang. Bagamat iba ang fulfillment as a mother, may mga adjustments talaga silang pinagdaanan ni Gian pagdating ng kanilang baby boy na si Gian Haley. Sheree gave birth last May 5.
"Okey naman kami. Medyo adjusting lang kasi naninibago kami sa mga pangyayari ngayon. Siyempre before, kung gusto mong gumimik, taping or whatever, nakakaalis ka. Ngayon, talagang una mo munang iko-consider siyempre yung baby na maiiwan," nakangiting pahayag ni Sheree.
Nakakaalis lang daw siya, gaya nung nakita namin siya sa GMA Network, sa pagkakataon na yun dahil ang mga magulang ni Gian ang humahalili sa kanya sa pagbabantay sa kanilang one-month-old baby.
"Nandoon naman yung parents ni Gian. Bale sila muna yung kasama. Sila talaga yung nagte-take over. Sobrang suwerte kong talaga, kasi yung family ni Gian, very supportive talaga silang lahat," lahad niya.
Pero ayon kay Sheree, hindi naman daw nila kasama ang mga magulang ni Gian sa bahay. They are living in a condo, kung saan bago pa man sila magsama ni Gian ay siyang tinitirhan na niya. Ang male singer daw ang lumipat dito.
Kung i-describe ni Sheree ang anak ay isang "happy baby." In fact, one week pa lang daw si Gian Haley, napansin na raw nila na mahilig itong mag-smile.
Ayon pa sa kanya, "Hindi pa talaga naa-absorb ng system ko [yung pagiging ina]. Pero ano, sobrang nakakatuwa ang baby. Alam mo yung word na amazing? Parang hindi mo alam kung paano mo ide-describe. Parang, ‘Oh my god, galing ba ito sa akin? Nailabas ko ba talaga ‘to?' Parang ganoon," natatawa niyang kuwento.
Natuwa si Sheree sa pansin namin na parang hindi siya nanganak. Aniya, dapat pa rin daw siyang magpapayat. Pero masuwerte raw siya at istrikto si Gian sa kanya.
"Kailangan kasi... Okey nga lang dahil si Gian, istrikto siyang talaga. Hindi niya ako pinapakain ng chocolates! Ngayon kasi, parang bigla akong tumotodo sa chocolates, pero kinu-control niya ako," lahad ng sexy actress.
Anong mga pagbabago sa relasyon nila ni Gian ngayong may anak na sila?
"Actually, it made us more stronger," sagot niya. "Parang mas lalo kaming in love with each other ngayong may baby na kami. Kasi mas nakakapag-open up na kami. Mas nakakapag-express kami ng feelings namin, considering na may baby na kami. We should be open with each other."
Puring-puri naman ni Sheree ang ama ng kanyang anak. Aniya, "Grabe, napaka-responsible ni Gian! Super! Talagang hands-on siya na nagpapadede sa baby. Gigising talaga siya kapag halimbawa hindi ko kayang gumising. Siya talaga yung gumigising para magpadede, magpa-burp. Napaka-very good pa niyang magpa-burp."
Definitely, hindi magku-quit si Sheree sa kanyang showbiz career kahit isa na siyang ganap na ina. In a few months, plano na raw niyang magpaka-aktibong muli sa showbiz. Pero as much as possible, hindi na raw muna siya magpapa-sexy.
"I'll be concentrating more on my album. At kapag may role na kukunin ako, siguro, yung mas seryosong role na at hindi na yung mga sobrang daring," sabi niya.
Never daw siyang pinagbawalan ni Gian sa pagpapaseksi niya. Sarili raw niyang desisyon ito para na rin daw sa kanyang anak.
"Si Gian kasi, ever since, kahit na nagmu-movie ako ng sexy, sobrang supportive na siyang talaga. In fact, siya pa nga ang kumukuha ng picture. Siya pa nga ang pinagpapa-praktisan ko. Alam n'yo yung ganun? May ganun talaga. It's really my decision.
"At si Gian, hindi siya nakikialam pagdating sa career ko. Kaya isa yun sa mga kina-inlaban kong lalo sa kanya," masayang pahayag ni Sheree.
Ibinalita rin ni Sheree sa PEP na baka raw sa katapusan ng buwang kasalukuyan na bibinyagan ang kanilang baby boy.