Hindi maitago ni Iwa Moto ang glow sa kanyang mga mata nowadays. In love kasi ang young actress at hindi niya isinisikreto ang masuwerteng lalaking muling nagpatibok ng kanyang puso.
Sa premiere night last Sunday sa SM Megamall ng pelikulang My Monster Mom, starring Ruffa Gutierrez at Annabelle Rama na palabas na today, kasama ni Iwa ang 29-year-old niyang businessman boyfriend na si Michael Ablan na tubong-Ilocos.
Four months nang mag-on sina Iwa at Michael at halatang masayang-masaya ang young actress sa kanyang newfound love.
"Mabait siya, responsible, very down-to-earth, hindi mo siya makikitaaan ng angas, in love talaga ako. At saka, sa akin, napi-feel ko na very important ako. Alam mo yun? Iyong feeling na alagang-alaga talaga ako," panimulang saad ni Iwa sa PEP (Philippine Entertainment Portal).
"One time nga nagkasakit ako, nataranta iyan, e," patuloy pa ng tsinitang aktres. "Siya yung nagdala sa akin sa hospital, siya kasi yung tipong hindi siya papayag na may manakit sa akin. Iyon ang pinakagusto ko, yung kaya niya akong ipagtanggol."
Paano ba sila nagkakilala?
"Friend ko yung kapatid niya, ‘tapos ipinakilala siya sa akin ng kapatid niya. Last year ko pa siya friend, although nagpaparamdam na rin siya, pero parang friends-friends, tropa-tropa, hang-out, hang-out, Starbucks-Starbucks lang, alam mo yun? Parang ganoon lang, ‘tapos ‘ayun na, na-fell in love na ako sa kanya."
Hindi naman kaya siya maging hindrance sa career ni Iwa, like kung kailangan ni Iwa na magpa-sexy?
"Hindi, supportive naman siya sa akin. Ang sabi niya sa akin, ‘Never akong magiging sagabal sa trabaho mo, alam ko iyong trabaho mo at naiintindihan ko iyon.'
"At saka ganito na lang, yung ex-girlfriend niya si Sachi Sanders, yung Viva Hotbabes? So, kung nagpapa-sexy ako, medyo mas next level iyong sa kanila. Kumbaga, kung ikukumpara yung rate ng pagpapa-sexy nila, para sa akin, medyo wholesome pa ako, di ba?"
Hindi ba parang nagkaroon ng issue sa kanila ni Sachi?
"Oo, pero naayos na namin iyon. Kasi sabi ko naman sa kanya, tama na, boyfriend ko na ito, at siya naman ay may boyfriend nang iba... Pero dapat nga noong time na iyon na nagsasalita-salita pa siya, hindi na siya nagsalita. Kasi that time, may boyfriend na siya at wala na naman sila [Sachi and Michael], so bakit kailangan pang umeksena?
"So, kinausap ko siya at sinabi ko na, ‘Hindi naman kailangan, huwag ka nang manggulo, ate. Ayokong mangarag sa iyo.' So, hayun, at sa pagkakaalam ko, buntis na yata siya, e. Five months na yata."
NO WEDDING PLANS YET. Paano naman kung yayain siyang pakasal bigla ni Michael, or bigla na lang, nabuntis siya?
"Naku, hindi pa ako magbubuntis, ano? Hello! Kapapanganak lang ng kapatid niya [Michael] at nakita ko kung paano manganak. Diyos ko, na-trauma ako roon! Umiiyak talaga siya sa sakit, kaya naawa talaga ako. Kaya parang pumasok sa isip ko na hindi ako magpapabuntis, mag-aampon ako. Utang na loob!"
"Kasal?!" pasigaw na reaction niya sa pag-uusisa ng PEP.
"Ano ba, dati ang tinatanong sa akin, kung kailan ako magkaka-boyfriend, ngayon naman kasal na agad?" pataray na tugon pa niya pero with matching lambing at malulutong na halakhak.
"Seriously, ate, definitely, as of now ay ayoko pa. Pareho kami, gusto namin, masaya lang, bago pa lang kami, nasa getting-to-know-each other stage pa. Maganda naman ang takbo ng buhay namin pareho, ayokong sirain.
"Kasi ang nasa isip ko, kapag stable na ako at the age of 25, yung stable na talaga, yung may business and everything, puwede na. Pero kung pagdating ng time na iyon at hindi pa rin ako stable, hindi pa rin [magpapakasal].
"Bale magtu-20 pa lang ako this August, e. So, may limang taon pa akong gugugulin para magpaka-addict sa trabaho," nakangiting esplika pa ni Iwa.
AIMING FOR NUMBER 1. Tungkol naman sa resulta ng katatapos lang na FHM Philippines' Sexiest Women, masaya naman daw si Iwa sa kinalabasan nito at target niya sa susunod na taon ang mapasali sa Top 5.
"Pang-seven po ako, kasama sa international iyon. Oo, masaya naman ako sa standing ko ngayon, umangat naman ako dahil last year, pang-10 ako, e.
"So, malay natin sa susunod na taon, mapasali na ako sa Top 5, hindi naman masamang target-in iyon, e, di ba? ‘Tapos next-next year, number one na, di ba? Ako naman kasi, sunod lang sa flow ng buhay. Kung ano ang mangyari sa buhay ko, ano ang dumating na blessings, nagpapasalamat ako," pagtatapos ni Iwa.