Diether Ocampo never forgets obligation to his child in the U.S.

Press conference pa lang noon para sa Iisa Pa Lamang, binanggit na ni Diether Ocampo na magsi-celebrate siya ng birthday with the entertainment press.

Katuwiran ni Diether, "Matagal-tagal na rin kasing hindi natin nagagawa yung ganito na magkasama-sama. At saka ako, gusto ko rin i-share yung mga blessings na natatanggap ko sa inyo. Kasi simula naman noong umpisa pa lamang, nandiyan na kayo. At yung press people rin ang nagsisilbing kritiko ko na nagagamit ko naman para mapagbuti ko pa ang trabaho ko.

Sa Pizza Hut Bistro sa Tomas Morato kahapon, July 22, ginanap ang birthday celebration ni Diet with selected press people. Ang Pizza Hut ay isa sa mga endorsements ni Diether na, for the longest time, ay nasa account pa rin niya. Malaki rin daw ang pasasalamat niya sa Pizza Hut dahil halos lahat ng events ng kanyang K.I.D.S. Foundation ay sinusuportahan nito.

FRUITFUL YEAR. Naniniwala si Diether na napakarami niyang blessings na natatanggap at ngayong taong ito, ayon sa kanya, ay pinaka-fruitful para sa niya.

"Pakiramdam ko, parang ngayon ko inaani lahat ng naitanin ko," saad ng aktor. "So siyempre, kapag nakakatanggap ka ng mga blessings, gusto mo rin ito na mai-share tulad nga ngayon."

Kung may iwi-wish man daw si Diether ngayon, yun ay ang madagdagan pa raw ang oras sa isang buong araw.

"Alam ko naman na imposible yung wini-wish ko dahil 24 hours lang naman talaga ang oras sa maghapon. Pero sana kung puwede lang talaga, yun ang gusto kong mangyari. Yung madagdagan ang oras dahil sa sobrang busy ko, parang kulang ang maghapon sa napakarami ko pang naiisip na gawin."

Yun nga lang, mukhang sa dami ng naiisip niyang gawin, tila ang pagse-settle down o paghahanap ng panibagong karelasyon ang hindi kasama sa mga plano niya.

"Well, hindi naman sa ganoon. Nagkataon lang talaga na wala pa rin namang dumarating. At saka napapansin ko kasi na kapag yun ang iniisip ko, parang biglang yung energy level, bumababa!" natatawa niyang sabi.

DIET'S CHILD. May anak na si Diether mula sa isang non-showbiz girl. "Dream" ang pangalan ng kanyang anak na kasalukuyang nag-aaral sa Amerika. Pero pagdating sa anak, halatang matipid kung sumagot si Diet.

"Very private kasi yung family ng mother, so hangga't maaari, ayaw rin nila na nasasangkot sa mga intriga. Yung anak ko, four years old na siya at kamukha ko," paliwanag niya.

Hindi rin daw siya puwedeng paratangan na hindi niya nagagawa ang financial obligasyon hinggil sa kanyang anak.

"Ah, hindi, yun naman ang masisigurado ko," sambit ni Diether. "Kasi bago ang lahat, sinigurado ko muna na okey ang anak ko at mabubuhay siya nang maayos at makakatapos siya ng pag-aaral niya hanggang college."

DEFENDING GABBY. Isa sa pinagkakaabalahan ngayon ni Diether ay ang taping ng primetime series sa ABS-CBN na Iisa Pa Lamang. Among the powerhouse cast, isa si Diether sa nakakakuha ng pinaka-favorable review from the critics and viewers.

"Malaki ang pasasalamat ko po sa mga sumuporta ng Iisa Pa Lamang," masaya niyang pahayag.

Muli na naman tuloy naungkat ang intriga na dehado ang role ng nagbabalik-showbiz na si Gabby Concepcion kung ikukumpara sa significance ng role ni Diether sa serye. Pero ayon kay Diet, "Well, siguro kasi nga, yung unang week na lumabas, medyo ini-establish pa lang ang mga character, pero malaki ang participation niya. Actually, siya yung pinakamalaki ang gagampanan na character."

Idinepensa rin ni Diether ang co-actor dahil aniya, wala raw katotohanan yung nagrereklamo ito sa outcome ng mga roles nila.

"Alam n'yo, in fairness to Gabby, wala akong nakita or, kumbaga, napaka-professional niya. Wala akong naririnig sa kanya. Kung meron man siyang naririnig na ganyang mga reaction, wala sa kanya. Alam naman niya dahil very secure siya. At saka mas naka-pick-up na siya ngayon. Kasi dati, kakabalik lang niya. Hindi na katulad dati na naninibago pa siya sa taping, sa oras."

Para kay Diether, wala rin daw katotohanan ang usap-usapang nahihirapan nang paartehin si Gabby.