Magkahalong kaba at excitement ang nadarama ngayon ni Precious Adona dahil malapit na ring ipalabas, sa wakas, ang kanyang launching film under Viva Films na pinamagatang Torotot.
August 20 ang launching date ng nasabing pelikula; 'sakto naman dahil August 22 and birthday ni Precious. Aminado ang dalaga na nakakaramdam siya ng pressure lalo pa't matagal-tagal na ring nag-lie low ang mga sexy movies sa takilya.
"Kasi sabi sa ‘kin ni Maui [Taylor], it's either you make it or break it," banggit ni Precious nang makausap ito ng PEP (Philippine Entertainment Portal) recently.
Natural lang naman siyempre na kabahan ang isang artista lalo pa nga't launching movie ang pinag-uusapan. Ngunit aware din si Precious sa napakalaking tiwala na ipinagkaloob sa kanya ng Viva. Sinabihan nga raw siya ni Maui na, "Magpasalamat dahil hindi lahat ay nabibigyan ng break."
Patuloy ni Precious, "Kailangan maghihintay ka pa ng sobrang tagal at mapatunayan ‘yong sarili mo bago ka nila bigyan ng break at i-launch ng ganoon kabilis. Kaya sobrang thankful ako, hindi ko naman sinasabi na perfect 'yong pagkaarte ko sa Torotot pero sana maa-apreciate ng mga tao na that is my first movie and that I really tried my best."
MORE THAN JUST A SEXY ACTRESS. Una nang gumawa ng ingay si Precious nang lumabas sa May 2008 issue ng FHM. Kung titingnan ang past covers ng nasabing popular men's magazine, masasabing pinaka-daring sa lahat ang ginawa ni Precious. Dahil tuloy dito ay lalong nasabik ang mga kalalakihan na mapanood ang Torotot. Kung sa magazine pa nga lang ay sobrang daring na ni Precious, e, ano pa kaya sa pelikula, katuwiran ng ilang fans.
Napangiti si Precious nang mabanggit namin ito sa kanya ngunit bigla rin itong kumabig at kinumpisal sa amin na hangga't maaari ay ayaw niyang makilala lang solely as a sexy actress.
"Sinabi ko po sa handler ko 'tsaka kay Boss Vic na the break that they gave me na sexy...sana ‘yon na ‘yong first and last. If you know me, the real person, [ang] pagiging sexy, hindi siya ako. Although ‘yong mga artista kaya nga artista you have to act like somebody else, just act the character. Pero I count that as an experience. Iba naman [for future projects], I'm willing to do any kind of roles. I really want to be a drama actress or a singer."
So, nangangahulugan ba na pinagsisisihan na niya this early ang pagpapakita ng skin sa harap ng kamera?
"I think in a way I did the right choice," seryosong sagot ni Precious. "Kahit ma-label man nila ako na sexy actress, di ba si Piolo [Pascual] naman started as a sexy actor also? So, probably, if I get to show people my capabilities with acting siguro makikita nila na hindi lang paghuhubad o pagpapa-sexy 'yong magagawa ng batang ‘yan marami pa siyang magagawa at malayo pa ang mararating niyan."