Last minute na halos ang naging advise na magkakaroon ng pagbabago sa venue sa ginanap na mini-press conference para sa independent digital film na Eskandalo ng Sunflower Films under the direction of Joven Tan.
Instead na sa isang bar sa may Roxas Boulevard, sa isang room sa Mariana Royale Motel along Roxas Blvd. din ginanap ang press conference ng Eskandalo. Nauna pa nga ang bida nito na si Emilio Garcia sa naturang motel room na sa aming palagay ay taxi room kung tawagin.
May paliwanag naman si Emilio kung bakit doon nila naisipang magpa-presscon. "Yung pinaka-eskandalosong eksena kasi sa Eskandalo dito ginanap, sa mismong room na ito kung kaya't para actual n'yo rin makita," sabi ni Emilio sa PEP (Philippine Entertainment Portal) at ilang entertainment press na naimbitahan sa naturang mini-presscon last Saturday night, August 9.
Isang bading na matagal nang nagtatago at hindi makapaglantad ang role ni Emilio sa Eskandalo. Isa siyang teacher na kung kailan nagka-edad ay saka pa naisipang sumubok na makipag-sex sa kapwa niya lalaki, played by Andrew Schimmer. Yun nga lang, first time lang niyang magta-try ay natapat pa siya sa maliit lang ang pagkalalaki at napagtawanan niya ito. Dahil dito, gumanti ang Andrew character at pinasukan naman ng marker pen ang tumbong niya.
Kuwento ni Emilio, hindi hamak daw talaga na mas daring ang role niya ngayon sa Eskandalo kumpara sa Selda, kung saan gay rin ang role niya. Sa Selda siya nakapag-uwi dalawang Best Supporting Actor trophies from Star Awards and Gawad Tanglaw.
"Kung sa daring, tingin ko mas daring ako rito. Although, may pagka-conservative ako dahil matanda na ako nang mag-decide akong mag-try na first attempt pa lang nga, ganoon pa ang nangyari. May shower scene din kami rito ni Andrew at, kumbaga, mas maeeskandalo kayo sa ilang scenes!" ang natatawa niyang sabi.
Hindi natatakot si Emilio na ma-identify siya sa gay films. Katuwiran niya, "Bakit naman ako matatakot? Ako kasi, yung mga ginagawa kong trabaho, hindi ko siya kinu-consider na kapag ginawa ko yung ganitong role, ang magiging tingin sa akin ng mga tao, ganoon na rin.
"Dati noon, gumagawa ko ng sexy films, puro babae naman ang mga kaeksena ko, hindi naman inisip ng mga tao na ganoon ako. Hindi naman ako natsismis sa kung sinu-sinong mga babae.
"Nagkontrabida rin ako, pero kapag ba nagkontrabida ka or gumanap ka ng masama, ang magiging tingin din sa ‘yo ng manonood, masama ka in real life? Hindi naman, di ba? So, sa akin, ganoon lang din yung pagganap ng gay films. Hindi porke't gay ang role mo, bakla ka na rin in real life. For me, trabaho lang," paliwanag ni Emilio.
Malaki nga raw ang pasasalamat ni Emilio sa mga ganitong klase ng roles dahil ibang challenge ang naibibigay sa kanya. More than a decade na raw siya sa showbiz, pero ngayong taon lang siya naparangalan bilang isang aktor.
"Malaking bagay talaga para sa akin yung pagkapanalo ko sa Star Awards at sa Gawad Tanglaw. ‘Tapos ngayon, balita ko, nominated din daw ako for Urian naman para sa pelikulang Selda pa rin.
"Para sa akin, yung award na natanggap ko, ito na yung puwede kong ipagmalaki sa mga anak ko. Hindi man nila napapanood yung mga movies na ginagawa ko, since most of my movies naman ay hindi puwede sa bata, yung trophy ko ang maipagmamalaki ko sa kanila hanggang sa lumaki sila."
Bukod sa tatlong award giving-bodies na kumilala sa husay niya bilang aktor, aalis si Emilio sa mismong araw ng birthday niya sa August 28 para sa Montreal World Film Festival dahil kalahok dito ang Selda.
"Ang ganda, kasi birthday ko pa mismo yun. At first time kong pumunta sa festival abroad at ang maganda pa, first time din na magkaroon ng entry ang Pilipinas sa World Film Festival. Ayokong mag-expect pero siyempre, kahit naman sino magwi-wish na magustuhan sa festival yung movie at magustuhan din ang performance namin."
Bukod kay Emilio, kasama rin daw niya ang co-star niya na si Sid Lucero at ang mga direktor nilang sina Paolo Villaluna at Ellen Ramos na pupunta sa Montreal, Canada.
Gaya ba ng Selda ay pang-award din ba performance ni Emilio sa Eskandalo?
"Well, hindi naman kasi ako ang makakapagsabi ng bagay na ‘yan, yung manonood. 'Tulad sa Selda, hindi ko rin ini-expect na mananalo ako ng award dun at mapapansin. Yung Eskandalo, ang kagandahan niya, mas commercial kasi ang movie. Pero acting-wise, iba rin, maganda rin," pagtatapos ni Emilio.