Dalawa ang shows na nagtapos noong Biyernes, September 5, sa Primetime Bida block ng ABS-CBN—ang The Singing Bee ni Cesar Montano at ang local version ng My Girl nina Kim Chiu at Gerald Anderson. Isang local soap lang muna ang magpa-pilot bukas, September 8, ang local version ng I Love Betty La Fea nina Bea Alonzo, John Lloyd Cruz, Vhong Navarro, at Ruffa Gutierrez ang papasok sa Primetime Bida dahil pre-empted sa Martes, September 9, ang pasok ng bagong Koreanovela ng ABS-CBN, ang Three Dads With One Mommy.
Sa pagbabago ng lineup ng Primetime Bida ng ABS-CBN, magbabago rin at mas magiging interesting ang tapatang mangyayari simula bukas ng gabi.
Aangat ang Dyosa ni Anne Curtis bilang unang soap ng Kapamilya network pagkatapos ng TV Patrol World. Makakatapat ng Dyosa ni Anne ang Codename: Asero ng ex-boyfriend niyang si Richard Gutiererz. Kung ang boyfriend ni Anne na si Sam Milby ang makakasamang makipagtunggali ng dalaga sa kanyang ex-boyfriend, isang dati namang Kapamilya na ngayo'y Kapuso nang si Heart Evangelista ang makakatulong ni Richard para sa Asero.
Dalawang Betty naman ang makakalaban ni Dyesebel simula bukas. Susunod sa Dyosa ang magbubukas na I Love Betty La Fea. Sa Dyesebel, Betty rin ang pangalan ng pinakakontrabida ni Marian Rivera sa lupa na ginagampanan ni Bianca King.
Counter-programming ang ginawa ng ABS-CBN na imbes na fantasy rin ang ipantapat sa No. 1 primetime soap ngayon na Dyesebel ay isang comedy ang bagong hahamon.
Patuloy naman ang labanan ng comedy ni Regine Velasquez sa Ako Si Kim Samsoon at drama ni Claudine Barretto sa Iisa Pa Lamang.
Sa susunod na linggo, tig-isang bagong shows din mula sa GMA-7 at ABS-CBN ang papasok sa primetime lineups ng dalawang station at tiyak na magbabago na naman ang scheduling.
Magpa-pilot na ang Survivor Philippines ni Paolo Bediones sa GMA-7 at Kahit Isang Saglit nina Jericho Rosales at Malaysian actress Carmen Soo sa ABS-CBN. Malamang na ipagitna ang Survivor Philippines sa Ako Si Kim Samsoon at My Husband's Woman, at baka itaas na ang Iisa Pa Lamang ni Claudine para mauna ang Kahit Isang Saglit.