For the very first time, nakuha na ngang humarap ng StarStruck Avenger at Pacboy ng Startalk na si Jan Manual nang live sa Startalk yesterday, September 13. Si Jan ay aksidenteng nahulugan ng torch sa mukha at ilang bahagi ng kanyang braso sa nakaraang KapusOlympics Watermania 2008 sa Golden Sunset Resort.
At first time rin na ipinakita sa Startalk kahapon ang actual na aksidsente na muntik nang ikasira ng kanyang buhay, hindi lang ng kanyang career. Pero sa unang pagkakataon nga na humarap si Jan nang live, hindi na halos mababakas ang pagkasunog sa kanang bahagi ng kanyang mukha. Dahil sa aksidente ay nagtamo siya rito ng second-degree burns.
Ayon nga sa Startalk host na si Joey de Leon, hindi nga naman biro ang sinapit ni Jan Manual, na halos malaking bahagi ng katawan niya ang nasunog at bumagsak pa siya mula sa taas na 8 feet.
Ikinuwento nga ni Jan ang actual na nangyari that night. Aniya, "Kasi po both teams, parang nagmamadali na. Yung ginawa ko na po, parang inangat ko na po ang torch. Kasi, nakita ko na po na dapat po talaga, si Maggie Wilson ang aakyat sa torch. Pero ako na po ang nag-volunteer na gagawa.
"Pagkaangat ko po, yun na... Kasi po, puno siya ng gas. So, tumapon po sa braso ko muna. E, nakadamit po ako, so, yung apoy, naiwan po sa damit ko. Malakas po talaga ang apoy. Habang tumatagal, mas tumitindi po siya."
Butch Francisco asked kung noong nangyari raw ba yun, inisip nga ni Jan na katapusan na niya?
"Opo...kasi, yung apoy, habang tumatagal, lumalaki so, ine-expect ko na yung apoy, kakalat na sa buong katawan ko, e. Parang wala na ngang way para mamatay ang apoy. Sobrang sakit na po talaga. Tina-try ko pa na mawala ang apoy, pero wala na, e, kumalat na sa mukha ko."
Three weeks din daw na nakaratay sa hospital si Jan. Kaya masasabing mahirap para sa isang taong tulad niya na every week nga raw, magkakasama sila sa Startalk, pero hayun at nakaratay siya't nagpapagaling.
Ano ang masasabing mga pinagdaanan niya nang mga oras na yun?
"Ay, sobrang hirap ko po. Kasi po, ine-expect ko pong talaga na magdidikit-dikit ang balat ko. Three weeks na nasa hospital ako at itong kanang-kamay ko, balot siya ng bandage. ‘Tapos yung isa naman po, naka-dextrose, so, ang hirap pong ikilos talaga.
"Every time na kumikilos ako, may kirot, may sakit."
Noong mangyari raw ang naturang aksidente, wala rito ang kanyang daddy, na nagtatrabaho sa isang barko.
"Ay opo, nagulat po kasi siya noong malaman. Hindi po talaga namin ipinapaalam. Kapag tumatawag po, sinasabi ni Mommy na, ‘Ah, nasa taping siya. Siyempre po, kung sasabihin po namin sa kanya, baka maging emotionally tortured po siya, kawawa naman po siya sa barko."
Mabuti na nga lang daw at hindi nakakapag-Internet ang ama dahil nasa gitna siya ng karagatan.
Dahil wala na nga halos makitang bakas ng pagkasunog sa kanyang mukha at katawan, Butch asked Jan kung nag-undergo ba ito ng plastic surgery para maayos ang anumang damage?
Aniya, "Luckily, wala naman po. Through prevention naman po at ina-anticipate naman po ng mga doctors yung mga worse po na puwedeng mangyari sa akin, so, binantayan po ako ng mga doctors."
Kinumusta na rin sa Startalk ang pagdalaw raw ng balitang nililigawan niyang co-StarStruck Avenger na si Jessie Corcuera. At dahil alam naman ng karamihan ang pagka-tigasin ni Jessie, tila nawala raw ito nang makita si Jan at hinimatay?
"Hindi po kasi niya nakayanan yung nangyari sa akin. Yung nangyari po kasi sa akin, grabe po talaga."
Lolit Solis added na ibig daw palang sabihin, love na love siya ni Jessie?
"Love na love po talaga ko ni Jessie," natatawa namang pahayag ni Jan. "Kasi, sobrang fresh po talaga ng sugat," sagot naman niya.
Nagtanong pa rin si Lolit, "Mag-on na ba kayo?"
"Kapag nalaman po niya, baka mag-break kami agad bigla, e," natatawa niyang biro naman.
Tinanong din ni Joey si Jan kung after raw ba ng naturang aksidente ay nagkaroon ng phobia si Jan sa apoy?
"Wala naman po...sa moomoo meron, pero sa nangyari, wala naman po," pagbibiro pa niya. Kaya sabi ni Joey, okey na raw talaga si Jan at nakukuha nang magbiro.
Tuloy, hiniritan siya ni Joey na hindi raw kaya nangyari yung aksidente dahil nililigawan niya si Jessie at parang illegal yata ‘yun. Follow-up naman ni Manay Lolit, palagay raw ba ni Jan ay babae talaga si Jessie?
"Opo...babae po ‘yun. Sayang po, e," natatawang sagot naman ni Jan.
Jan was also asked kung pinagsisisihan daw ba niya ang pagsasakripisyo para sa kanyang team sa KapusOlympics?
"Ay, hindi po...kasi, game naman po yun. Wala naman pong may gusto no'n. At saka, may kasabihan nga po, ‘Sacrifice once, so others may live.'"
Under treatment pa rin daw si Jan ngayon, so, till when yung masasabi na maaari na nga siyang makabalik talaga at makapagtrabahong muli?
"Kasi bale, monthly po yung medication ko, tuloy pa rin po. At inaabangan pa rin po ng mga doctors yung part na medyo malalim po kasi, keloidal po ako."
Keloid ang tawag sa mga scars na naiiwan pagkasunog ng balat.
Sa huli, ibinalita na nga rin na malapit na rin siyang magbalik-telebisyon sa pamamagitan ng Gagambino. Siya ang gaganap na bading na P.A. ni Katrina Halili. Naging pagkakataon na rin ni Jan na magpasalamat sa lahat ng mga taong tumulong, nagdasal at sumuporta sa kanya during the time na kinailangan niyang magpagamot at pansamantalang mawala sa showbiz.