Jacket at t-shirt ang regalo ng Pinoy Big Brother (PBB) Teen Edition Plus third big placer na si Nicole Uysengsiu sa dating co-housemate niya na si Josef Elizalde noong birthday ng binata, September 8.
"Galing sa savings ko yung pinabili ko sa gift ko para sa kanya," nakangiting sabi ni Nicole nang makasalubong siya ng PEP (Philippine Entertainment Portal) kamakailan.
Ano ang birthday wish niya kay Josef?
"Ano lang, luck sa career niya and sana more projects to come para sa kanya, and sana maging masaya siya kung anuman ang ginagawa niya."
Bago ang birthday ni Josef, nag-celebrate rin si Nicole ng kanyang 18th birthday last month. Tulad ng birthday ni Josef, ang fans club nila na Yonics din ang namahala ng kanyang debut party sa isang hotel.
"Before, sinabi na nila sa akin na gusto nilang maghanda ng debut para sa akin. E, nung una ayoko kasi nahihiya ako sa kanila. Kasi sila ang magbabayad ng lahat. E, wala, gusto talaga nila. So, sobrang thankful ako sa kanila and sobrang saya!"
Si Josef ang naging escort niya sa kanyang debut.
"Birthday wish ko is ano, basta sana tuluy-tuloy pa rin ang career ko. Sa family ko, sana healthy sila and happy."
Kumusta na sila ni Josef?
"Okey naman. Parehas lang, wala namang nagbago. Mas naging close lang kesa nung nasa bahay kami ni Kuya."
Sabi ni Josef, mas malalim na raw ngayon ang relasyon nila. Ano ang masasabi ni Nicole dito?
"Ah, hindi ko alam," nahihiyang sagot ng dating PBB teen housemate.
Ayon pa kay Josef, sa tingin niya ay nasa 7 to 8 na score ang chance niya kay Nicole, na sasagutin kapag nagtanong na siya sa kanya. Ano ang kailangang gawin ni Josef para maging 9 or 10 ang score ng binata?
"Hindi ko alam. Masyadong ano pa, wala naman. Pero gusto lang namin, take it slow and ayaw naming mag-rush. Kasi kumbaga, kung mabilis, madali ring mawala. Ngayon, yung friendship lang namin ang importante ngayon," saad ni Nicole.
Ayon kay Josef ay nagsimula na siyang manligaw kay Nicole. Totoo ba ito?
"Ay, hindi ko po alam!" nagulat na sabi ni Nicole. "Feeling ko, kasi po siguro more...a little bit more but not yet lovers."
Paki-describe si Josef bilang manliligaw?
"Super-caring siya, kasi like ‘pag aalis kami... ‘Tapos kapag hindi kami magkasama, tine-text niya ako. Like, ‘Sa'n ka? Text me when you get home.' Yung mga ganun."
Sa pagkakaalam ni Josef, siya lang ang nanliligaw kay Nicole. Totoo ba ‘yun?
Natawa si Nicole, sabay sabing wala talagang iba kundi si Josef lang.
Hindi pa raw tinatanong ni Josef kung puwede siyang maging boyfriend ng dalaga. Kapag tinanong ba si Nicole, ano sa tingin niya ang chance ni Josef sa kanya?
"Siguro ano, six. Hindi kasi ano, ayoko pa kasi ng serious relationship ngayon. Yun nga, gusto ko slow lang, slowly. Hindi yung nagmamadali. Kung magbo-boyfriend ako ngayon o sasagutin ko siya, serious na yun. My relationship, I take it seriously talaga. Ayoko nung laru-laro lang."
Okey na ba ang Mommy niya sa kanila ni Josef?
"Oo, okey naman si Mommy," sagot ni Nicole. "Hindi naman siya tutol. Kasi nung time na ‘yon sa PBB, ayaw lang niya kasi, yun nga, may relationship kami outside. So, paglabas namin, nung naayos na namin yung relation namin sa mga ex namin, okey na."