Binigyang linaw ng TV host at Optical Media Board (OMB) Chairman na si Edu Manzano sa PEP (Philippine Entertainment Portal) ang lumabas na report tungkol sa naganap na argumento nila diumano ni Wendy Valdez sa set ng hinu-host na programa ni Edu sa ABS-CBN, ang Pilipinas, Game KNB? Guests sa naturang episode ang cast ng I Love Betty La Fea, kung saan kasama si Wendy.
Ayon sa usap-usapan ay pinanindigan daw ng Pinoy Big Brother ex-housemate na si Wendy na tama ang kanyang sagot sa tanong ni Edu. Pero nang plinayback ang sagot ni Wendy ay lumabas na mali ang pronunciation niya sa first syllable ng tamang sagot. Dahil dito ay nauwi raw ang pangyayari sa pagwu-walkout pareho nina Edu at Wendy.
Sa panayam ng PEP kay Edu sa prescon ng OMB kaugnay ng kampanya nito against child pornography noong September 16, Tuesday, napag-usapan namin ang tungkol sa nasabing insidente at nilinaw ng TV host kung ano talaga ang nangyari.
Paliwanag niya, "Sa aming programa kasi, there's what you call 'no host intervention.' Ang ibig sabihin nito, ang host, huwag kang makialam kasi host ka lang. If there's any question, it has to be directed towards the production.
"Halimbawa, may nagtsa-challenge na feeling niya tama ang sagot niya, kung gusto niyang i-challenge yung question ay labas na ako diyan. Hindi na ako puwedeng makialam because these are all based on facts, with all information. Kahit gustuhin ko mang tumulong o makipag-usap, ang usapan namin ‘pag may problema sa contestant, I have to take a back seat, so umalis ako. Alam ko nagsentimiyento si Ms. Wendy, pero hindi sa akin kundi dun sa question na akala niya ay tama siya," lahad ni Edu.
According to Edu, hindi naman ito ang unang pagkakataon na may ganitong insidente sa Pilipinas, Game KNB? Madalas na rin daw pala itong nangyayari sa iba pang contestants ng naturang game show.
"Hindi lang naman siya [Wendy], ang daming nagtsa-challenge. Almost every game, mayroon. Halimbawa sinabi nilang ito ang sagot nila, ang ginagawa, nilalabas ang libro para sigurado. Dito nakalagay kung saan nagmula yung tanong saka kung ano talaga ang tamang sagot," ani Edu.
CAMPAIGN AGAINST CHILD PORNOGRAPHY. Bukod sa pagiging isang mahusay na TV host, ginagampanan din ni Edu ang pagiging Chairman ng Optical Media Board. Sa ngayon ay nakatuon ang kanilang pansin sa child pornography katulong ang Anti-Child Abuse Child Pornography Foundation Corporation. Ayon kay Edu, nakakaalarma na raw ang paglala ng sitwasyon at ng problemang ito.
"Sad to say, but it's getting worse," sambit ni Chairman Manzano. "Others are thinking for as long as na hindi sa mga anak ko, okey lang; di baleng mangayari sa iba. But now, napapansin nga namin, pabata nang pabata, palala nang palala.
"As a matter of fact," patuloy niya, "last month lang, end of August, may isang minor na ni-rape na apat na lalake kung saan kinunan ng cell phone. Hindi mo na maisip kung ano ang pumapasok sa isip nila, kinukunan yung mga sarili nila, tumatawa habang ginagahasa yung babae. So what they did after, kinuha yung kanilang cell phone, in-upload sa computer at nag-burn ng copy and then they mass produced it at ibinebenta, ginagawang negosyo. What I'm saying is that our children are not safe anymore."
Sa ngayon ay malaking tulong ang isang milyong pisong pondo na nalikom ng OMB para sugpuin ang problemang ito. Sa pamamagitan ng info text ay puwede na ring isumbong ang ganitong kalaswaan sa mga kabataan.
"Last year, we put up P400,000 and it allowed the OMB to get information on the actual distribution centers. Naging mas maganda, kaya lang we cannot use government funds. We decided to put up one million pesos and it was not a pledge, it's been deposited already in the bank. We have the bank certificate and we're gonna use this money this year.
"Right now, we're not only after confiscation and other stuff. But with the help of info text, puwedeng maibigay mo na yung information na confidential at walang nakakalaam kung sino ka kundi kami. Kung may info na puwede naming ibigay sa PNP [Philippine National Police] at magkaroon ng postibong resulta, we will give rewards. We will also move towards providing these victims with post-traumatic counseling—emotionally, physically, mentally—and we hope hat we will tie up with other agencies like the DSWD [Department of Social Welfare and Development."
Sa magandang record niya bilang OMB Chairman, may balita tuloy na lumabas na tatakbo raw sa Senado si Edu. Nilinaw niya agad ang tungkol dito.
"Never akong nagsalita ng ganyan, nagkataon lang na apparently kung sinu-sino man sila, gumagalaw ang mga survey. Kung sakali man nasama ang pangalan ko, nasasama lang, sila ang nagsasabi. But we never ask anyone to include our names in any surveys."
ON SON LUIS. Hiningan din ng PEP ng reaksiyon si Edu sa balitang pagkakamabutihan ng anak niya kay Governor Vilma Santos na si Luis Manzano sa young actress na si Angel Locsin. Kung si Governor Vi ay hindi pa handang maging lola at ayaw pang magpakasal si Luis, para naman kay Edu, it's still Luis's decision kung gusto na talaga nitong magkaroon ng sariling pamilya.
"My son is a wonderful individual," papuri ni Edu sa anak. "Any woman would be lucky and any parent would be fortunate to have a son like Luis. Ako, ang importante ay makapagtapos sila, maghanapbuhay. And then, kung gusto na niya akong gawing lolo, okey lang yun, I don't mind at all.
"I like Angel, she's very nice. It doesn't really matter sometimes what the parents' think, it's how they're being together. As long as you're happy, yun ang importante. Ako, hindi ko pa rin alam ang tamang edad para mag-asawa ang isang tao, ang mahalaga pa rin ay yung maturity, alam nila ang kanilang pinapasukan. It's not all good times, it's lot of sacrifices," pagtatapos ni Edu.