Nag-pictorial na ang buong cast ng bagong telefantasya ng GMA-7, Gagambino, September 16, sa GMA Network Center. Bida rito si Dennis Trillo. Kasama rin sina Katrina Halili, Nadine Samonte, Jean Garcia, Bernadette Allyson, Isabel Oli, Mart Escudero, at Jennica Garcia sa pictorial.
Dito'y inamin ni Dennis na kinakabahan siya sa pagbibida niya bilang Gagambino. Unang-una, dahil papalit ang Gagambino sa timeslot ng top-rating Dyesebel. Pakiramdam ni Dennis ay baka mahirapan silang pantayan man lang ang napakataas na rating ng Dyesebel.
"May pressure nga doon pa lang. Siyempre, marami ang nag-e-expect na maging kasing-taas namin ang Dyesebel. Ang dasal ko lang naman ay makapantay man lang. Hindi na ako siguro hahangad pa na talunin yung naging ratings nila. Pero kung makakuha kami ng mas mataas, matutuwa pa rin naman kami, di ba? At least, na-meet namin ang expectations nila kahit papa'no," pahayag ni Dennis sa PEP (Philippine Entertainment Portal).
Pangalawa, first time ni Dennis na maging solong bida sa isang primetime series. Huli siyang naging lead sa telefantasya na Zaido, pero kasama niya rito sila Aljur Abrenica at Mark Cielo. Naging leading man naman siya sa mga afternoon drama series na Kung Mahawi Man ang Ulap at Magdusa Ka, kung saan nakatambal niya ang leading ladies niya ngayon sa Gagambino na sina Nadine Samonte at Katrina Halili.
Kaya para kay Dennis, iba raw ngayon sa Gagambino dahil nasa title role na siya.
"Mas nakakakaba dahil parang bitbit ko ang buong show. Sa akin nga pinagkatiwala ang Gagambino na project and it's up to me na pagandahin ang bawat episode na mapapanood nila.
"But of course, hindi ko naman magagawa ‘yan na ako lang. Maganda ang cast na nilagay nila, lalo na ang mga leading ladies ko na sina Nadine at Katrina, na kailan ko lang naman nakatrabaho pareho. Lahat naman kami, nagdarasal na maging maganda ang pagtanggap nila sa bagong telefantasya na ito ng Kapuso network."
NO MEDIA FANFARE. Naging tahimik at walang media fanfare ang first birthday celebration ng baby boy ni Dennis na si Calix Andreas last September 13. Desisyon daw ni Dennis at ni Carlene Aguilar na maging tahimik at hindi parang media circus ang first birthday ng kanilang anak.
"Yun naman ang gusto naming dalawa para makaiwas na rin sa anumang gulo or tsismis, di ba? Kami naman ni Carlene, nagkakasundo kami sa ganyang bagay, lalo na when it involves our son Calix.
"Naintindihan naman kami ng mga friends namin sa media na walang big coverage ng birthday ni Calix. Gusto namin ng tahimik lang para enjoy lahat. Mahirap na kasi na kapag may media, may mga masasabi pa ang ibang tao. Mabuti na yung wala na lang para tahimik at maayos na naidaos namin ang kaarawan ni Calix," pagtatapos ni Dennis.