Magkasunod na na-interview ng Startalk kahapon, September 20, ang manager ni Patrick Garcia na si Arnold Vegafria at ang dating girlfriend ni Patrick, at ina ng kanyang anak, si Jennylyn Mercado.
Kinumpirma ni Arnold ang pagbabalik ng Pilipinas ng kanyang alaga. Ayon sa manager ni Patrick, sigurado raw na haharapin ng young actor kung anuman ang problema nila ni Jennylyn.
"Darating na si Patrick next week," sabi ni Arnold. "So, I don't know what exactly. May tinatapos kasi siyang module sa thesis niya. But definitely, next week, darating na siya. Definitely, yung problema niya kay Jennylyn, haharapin niya yun. At anumang obligasyon niya kay Jennylyn, haharapin niya yun."
Dagdag ng manager, "Ang advice ko rin kay Patrick at kay Jennylyn, mag-usap silang dalawa para ma-settle kung anuman ang mga problema nila."
Kahit ang pamilya raw ni Patrick ay excited nang makita ang baby ng young actor kay Jennylyn. Pero ayon na rin kay Arnold, wala naman daw way para makita nila ang bata. Yun nga lang, mukhang hindi pa raw yata open ang pamilya ni Jennylyn for them to see the baby.
"Ako, very excited, even si Cheska Garcia [Patrick's sister], no matter what, kadugo nila yun. At sana maging open sila na makita rin ni Patrick ang bata," asam ni Arnold.
Ayon din kay Arnold, from the beginning, wala namang doubt kay Patrick na anak nga niya ang bata.
"I'm sure, he's excited to see the baby. Hindi naman niya idine-deny yung bata. Especially kapag nakita pa siguro niya yung bata, baka mas lumambot pa ang puso niya at magkabalikan pa silang dalawa."
Kasabay ng pagpapa-interview na yun ni Arnold ay ang paglilinaw niya na nasa Amerika talaga si Patrick at hindi sa isang undisclosed rehab center gaya ng nabalita.
"Si Patrick, nag-aaral, he's in America," diin ni Arnold. "Yung short courses niya na ipinasok siya ng dad niya para naman meron din siyang diploma na maipakita sa pamilya niya. Matagal nang plano yun. Hindi pa man buntis si Jennylyn, nakaplano na yun. It's just that, ngayon na lang natuloy yung planong ‘yun."
JENNYLYN MOVES ON. Pagkatapos ng panayam ng Startalk kay Arnold, nakapanayam naman ni Joey de Leon si Jennylyn via phone patch.
Unang kinamusta ni Joey kay Jennylyn ang baby niya na si Alex Jazz Mercado. Obviously, very proud mom si Jen sa pagde-describe sa kanyang baby. "Okey naman po siya. Malaki na! Ang cute-cute!"
Pero bakit nga ba Alex Jazz ang pangalan ng baby?
"Yung father ko ang nag-decide. Siya yung pumili ng name na Jazz. ‘Tapos, noong nasa ospital kami, noon na lang kami nakapag-decide ng first name. Kasi, lucky raw sa mga Chinese ang letter A. So, yun," paliwanag ng young actress.
Kinumusta rin ni Joey kay Jennylyn ang ina-inahan ng young actress na si Mrs. Lydia Mercado. Hindi rin kasi birong stress ang naranasan nito sa pagkamatay ng asawa niyang si Mr. Roger Mercado ilang araw pagkatapos makapanaganak ni Jennylyn.
"She's okay na, tuwang-tuwa na siya sa baby. Ayaw na niyang bitawan. Sobrang happy na," saad ni Jennylyn.
Tinanong ni Joey si Jennylyn kung narinig na ba niya na darating si Patrick next week.
"Talaga? Hindi ko narinig!" natatawa niyang sabi.
Ano ang reaction niya na excited daw si Patrick na makita ang anak nila?
"Reaction? Tito Joey, ano, e, I don't want to talk about it. Ayoko nang i-tackle yung mga ganyang things. For me, past is past na. At naka-move on na po ako. Let's move on, everybody."
Willing ba siyang ipakita si Jazz sa ama niya?
"Siguro kapag dumating na lang yung tamang time," sagot ni Jennylyn.
Wala raw "daddy-daddy" ang baby niya dahil kahit naman noong time na ipinagbubuntis niya ang anak, siya lang din mag-isa.
Wala na ba talaga siyang ugnayan mula sa kampo ni Patrick?
"Wala, wala na po. Yun nga, pinalaki ko siyang mag-isa. So, hanggang sa siguro dumating na yung time na matuto na siyang maglakad, hanggang sa mag-aral siya. Yun," sabi ni Jennylyn.
Inulit ni Joey kay Jennylyn ang sinabi ng manager ni Patrick na mukha raw may posibilidad pa na magkabalikan sila ng young actor.
"Ako kasi, Tito Joey, I'm very happy na and contented with my life. I don't want to talk about them na. I hope they know what I mean. Right now kasi, naka-focus na lang ako sa baby ko and my family. Ngayon, I'm looking forward to work na sa GMA, next month."
Totoo bang may movie silang gagawin ni Katrina Halili?
"Opo, mag-i-start na po kaming mag-shoot next month at sobrang excited na po akong magtrabaho at bumalik na ulit," sabi ni Jennylyn, na ang tinutukoy ay ang One Night Only ng OctoArts Films.
Tinanong ni Joey si Jennylyn sa kung ano ang reaction niya sa inamin ng dati niyang boyfriend na si Mark Herras sa Showbiz Central na there was a time na nagkaroon siya ng feelings for Katrina.
"Ay, napanood ko nga po ‘yan! Normal naman po siguro na ma-in love kay Katrina at magkaroon ng feelings for Katrina. Naku, napakabait ni Katrina at napakaganda, so bakit hindi? Sayang, bakit hindi tinuloy?" tawa ni Jennylyn.