Ipinararating ni Jenny Syquia-Skarne sa Concepcion family ang kanyang taos-pusong pakikiramay sa pagpanaw ng kanyang dating father-in law na si Mr. Rollie Concepcion. Sa email na natanggap ng PEP (Philippine Entertainment Portal) mula kay Jenny, ipinahayag nito na mabilis na nakarating sa kanya ang malungkot na balita.
Agad na ipinaalam ni Jenny sa anak niyang si Cloie ang pagpanaw ng lolo nito. Si Cloie ang anak nina Gabby at Jenny. Halos dalawang taon lamang si Cloie nang maghiwalay ang mga magulang niya noong 1996 at dalhin siya sa Amerika ng kanyang ina.
Ayon kay Jenny, nakikita niya sina Gabby at Rollie sa mukha ng kanyang anak dahil kamukhang-kamukha si Cloie ng ama at lolo nito.
Mula sa Amerika, nag-migrate sina Jenny at Cloie sa Sweden nang magpakasal si Jenny sa kanyang childhood sweetheart na si Filip Skarne. May isang anak sina Jenny at Filip, si Filippa.
Labindalawang taon nang hindi nagkikita sina Gabby at Cloie. Malayo man siya sa kanyang biological father, makakaasa si Cloie na mahal at nasa alaala siya ni Gabby at ng pamilya nito.
Nakita namin sa tahanan ng mga Concepcion ang litrato ni Cloie sa malaking family tree na nakalagay sa living room. Kasama ng larawan ni Cloie sa family tree na ginawa ng nanay ni Gabby ang larawan ng kanyang mga kapatid sa ama—sina KC (kay Sharon Cuneta), Gabrielle (kay Grace Ibuna), at Samantha (sa asawa ngayon ni Gabby na si Genevieve Yatco).
Isa nang successful businesswoman si Jenny. Siya ang may-ari at designer ng Charm and Luck Bags (www.charmandluck.com) na ginagamit ng mga sikat na Hollywood star. Maraming beses nang na-feature sa mga U.S. magazine ang bags na gawa ng kumpanya ni Jenny.