Pagkatapos ng screening ng indie film na Aurora sa UP Film Center kagabi, January 20, nagpaunlak ng ilang minuto si Rosanna Roces para makausap ng entertainment press.
Nagiging controversial ang Aurora dahil dalawang beses itong binigyan ng X-rating ng Movie Review & Television Classification Board (MTRCB). Kaya ngayon ay may plano ang direktor nito na si Adolf Alix Jr. na mag-submit ng appeal letter sa Malacañang para maipalabas sa mga sinehan ang pelikula.
Pagkatapos naming mapanood ang Aurora, kumpara sa ibang sexy films ay masasabing hindi naman maituturing na sexy o bold ang pelikula na pinagbibidahan ni Osang. Ilang segundo lang ang mashing ng boobs ni Osang ng co-star niyang si Kristoffer King.
Ano ang masasabi ni Rosanna sa bagay na ito?
"Kayo na ngayon ang magsasabi para masabing hindi ginawa ang movie para i-titillate ang mga manonood. Hindi talaga! Walang mati-titillate, di ba? So, parang kayo na ngayon ang humusga kung anong klaseng MTRCB meron tayo ngayon!" diretso niyang pahayag.
During her speech before the screening of the movie, sinabi ni Rosanna na siguro raw ay dahil sa siya ang bida ng pelikula kaya't X agad ang ibinigay na rating ng MTRCB. Was it a joke or seryoso siyang talaga sa sinabi?
"Puwede rin!" bulalas ng aktres. "Kasi, di ba, ang dami kong napanood na mas grabe pa at talagang menor de edad pa nga yung mga nagbo-bold? Lintek ang pumping! E, ito kung makikita n'yo, kakarampot nga lang ang eksena. Noong tumayo si Kristoffer King, diniliman pa ang eksena."
Dagdag niya, "Naka-panty pa ako sa eksena run! Kaya nga nakaganun [nakatakip] ang kamay ko para matakpan ang garter. So, talagang nagpaka-conservative pa ako ng lagay na yun."
Ayon kay Osang, unang beses niyang napanood nang buo ang movie kagabi. Mas nag-worry raw siya sa kung ano ang mararamdaman ng nanay niya.
"E, siyempre, first time na makakita ng suso na nilalamas-lamas!" natatawang sabi ni Osang. "Wala naman! E, siyempre, kapag may hindi maganda, unang-una, magre-react yun!"
Masasabi rin naman na dati pa niyang ipinapakita ang boobs niya.
"Naku, e, kahit ba makita! Luzon, Visayas, Mindanao nakikita na yun, di ba? Kahit nakapikit siguro, kaya na itong i-drawing ng lahat ng tao!" tawa niya ulit.
Mariin ding sinabi ni Osang na ang sigurado raw, hindi raw sila magpuputol ng anumang eksena para lang tanggalin ng MTRCB ang X na rating ng movie.
"Definitely, hindi kami magpuputol! Ang gusto nila, parang i-pixilize yung scene. Ano yun, DVD copy? Parang cartoon? Hello! Hindi puwede! Hindi naman ganoong direktor din si Adolf na basta papayag."
So, hindi sila papayag na magputol ng scene?
"Putulan ng ulo yung mga taga-MTRCB!" tawa niya. "Kayo naman ang nakakakita. Nakita n'yo naman."
Nakaramdam ba siya ng disappointment sa pangyayari, lalo pa nga't comeback movie niya ang Aurora?
"E, hindi. Naiinsulto ako sa katangahan nila [MTRCB]! Kasi, di ba, parang ininsulto mo na rin ang audience ko? E, ang ina-apply namin R-18, hindi naman PG-13! Parang inaano mo ang kapasidad ng audience na manood kung ano ang gusto nilang panoorin. Parang nililimitahan mo na rin sila."
Comeback movie niya, controversial pa rin?
"Ewan ko! Hindi ako nagpapaka-controversial. E, kasi, wala namang dapat ipag-ingay dun sa movie kundi yung the movie itself."
So, kakabit na talaga niya ang controversial?
"Ang X! X-rated!" natatawa niyang sabi.
Masasabi ba niyang tuloy-tuloy na nga ang pagbabalik pelikula niya?
"Oo! Kasi, may gagawin pa ko with Dante Mendoza. Pero secret muna."
Nag-e-enjoy naman siya sa paggawa ng mga independently produced film?
"Oo, sobra!" bulalas niya. "Kasi masyadong nirerespeto yung pagka-artist mo. Kahit sabihin pang mas maliit ang budget, pero talaga, totoo yun! Lintek ang pagkarespeto nila sa mga artista. Para kang nilalagay sa pedestal."
Nararamdaman nga raw niya ang pagpapahalaga sa kanya. Tulad na lang sa ginawa sa kanya sa Aurora, na tulad din ng pagpapahalagang ibinigay nang gawan ng Adela si Ms. Anita Linda.
"Ako naman, kung anuman ang ibigay sa akin, gagalingan ko naman. At least, hindi man pahalagahan dito sa sarili nating bansa, sa ibang bansa man lang, mapansin," saad ni Osang.