Kumalat sa Facebook accounts ng ilang entertainment press, kabilang na ang writer na ito, ang isang pribadong message tungkol sa Pinoy Big Brother (PBB) Season 2 housemates na sina Wendy Valdez at Bruce Quebral.
Nakiusap ang nagpadala ng private message sa amin na huwag banggitin ang kanyang pangalan kung sakaling magdesisyon kaming isulat ang tungkol dito.
Sa artikulo kasi namin kay Wendy na lumabas dito sa PEP (Philippine Entertainment Portal) noong April 24 ay may nag-post ng comment na ikinasal na diumano sina Wendy at Bruce noong March. (Click here to read related story.)
Ang ginawa ng aming source ay nag-verify siya sa National Statistics Office (NSO) at nagbigay siya ng link. Kapag binuksan ang link ay makikita ang mga sumusunod na impormasyon:
Husband: Bruce Angelo Averion Quebral
Wife: Wendy Manalus Valdez
Marriage Date: 2009-03-10
Base sa record na ipinadala sa amin ng aming source, lumalabas na ikinasal sina Wendy at Bruce noong March 10, 2009.
Upang kumpirmahin ang nakuha naming impormasyon, tinawagan ng PEP ang dating manager ni Wendy na si Ambet Nabus kaninang hapon, April 28, upang hingin ang number ng aktres. Pero si Ambet na mismo ang nagprisinta na tawagan si Wendy at alamin kung totoo ngang nagpakasal na ito kay Bruce.
Pagkatapos ng ilang minuto ay tumawag si Ambet sa PEP upang ipaalam ang naging usapan nila ni Wendy. Ayon kay Wendy ay hindi raw totoong ikinasal na sila ni Bruce.
Dagdag ni Wendy, nakorner lang daw siya ng mga reporter sa presscon ng Precious Hearts Romances Presents Bud Brothers at yung tungkol sa pagpapakasal ang mga tanong sa kanya. Pero tumanggi raw ang aktres na may kasalan na naganap.
Ayon naman kay Ambet, tinanong daw niya ang dating alaga kung bakit may date pang nakasaad sa kumakalat na dokumento.
Ito raw ang naging tugon ni Wendy kay Ambet: "Hindi ko alam. Hindi ko alam kung saan nila nakuha yun. Kung magpapakasal man ako, alangan namang hindi ko ipapaalam sa 'yo? Siyempre isa ka sa magiging ninong."
Naging kontrobersiyal sina Wendy at Bruce habang nasa loob sila ng PBB house dahil na rin sa pagiging close nila at sa "attitude" ni Wendy.
Bago matapos ang 2008 ay nagdesisyon si Bruce na iwan ang pag-aartista at subukan ang kanyang kapalaran sa ibang larangan. Ngayon ay nagtatrabaho siya bilang flight steward sa Emirates.
Si Wendy naman ay patuloy pa rin sa kanyang showbiz career.
Sa nauna nilang interviews ay inamin ni Bruce na balak na niya talagang pakasalan si Wendy.