Anim na araw bago ang eleksyon sa Lunes, May 9, unti-unti namang dumami pa ang mga artistang libreng iniendorso ang kandidatura ni Congresswoman Leni Robredo sa pagka-bise presidente.
Bukod kina Kris Aquino, Dingdong Dantes, Marian Rivera, Enchong Dee, Angelica Panganiban, Mariel Padilla, Bea Binene, at Rica Peralejo, nadadagdag sa kanila ang ilan pang celebrities at director na nangako ng suporta para sa Liberal Party vice-presidential candidate.
Ilan sa kanila ay ang sina Christian Bautista, Erik Santos, Agot Isidro, John Arcilla, Ana Roces, Jason Abalos, at Mark Escueta.
Kabilang naman sa mga film and TV directors na naghayag na ng kanilang suporta kay Leni ay sina Antoninette Jadaone, Pepe Diokno, Rowell Santiago, Mark Reyes, Joyce Bernal, Perci Intalan, at Jun Lana.
Samantala, itinanggi naman ni Leni sa panayam sa kanya sa Bandila kagabi, May 2, na pinahintulutan niya ang kanyang mga tagasuporta na magpakalat ng campaign posters niya kasama sina James Reid at Nadine Lustre.
Itinanggi na rin ng VIVA na may iniendorsong politicians ang JaDine.