Freddie Aguilar says Charice and Arnel Pineda prove that Filipinos are "monkeys"

"E, pinatototohanan lang ang sinabi ni Mariah Carey na tayong mga Filipino ay mga unggoy. Kasi, wala tayong sarili, gaya-gaya lang tayo. Nasa Amerika ka na, binigyan ka na ng pagkakataon na kumanta sa Oprah, bakit kumanta ka pa ng kanta ni Celine Dion? Sinabi ni Mariah na mga unggoy ang Filipino, gaya-gaya lang kayo, e, di napatunayan nga, totoo nga," says Freddie Aguilar (main photo) about Filipino international artists Charice Pempengco and Arnel Pin


Matitindi ang naging pahayag ng legendary singer-composer na si Freddie Aguilar ukol sa ilang kaganapan sa music scene, partikular ang hinggil sa piracy sa music industry, pati ang adhikain niyang pagpapalit ng ilang linya sa Lupang Hinirang, at ang pagiging prominente ngayon ng ilang Pinoy talents sa States tulad nina Charice Pempengco at Arnel Pineda ng Journey.

"Hindi maganda ang masasabi ko, e, gusto n'yo sabihin ko?" tila parang pasintabi niya na may halong paghahamon nang tanungin ng PEP (Phlippine Entertaiment Portal) si Freddie tungkol kina Charice at Arnel noong July 3 sa grand opening ng kanyang Ka Freddie's Music Bar and Restaurant sa Adriatico, Manila.

"E, pinatototohanan lang ang sinabi ni Mariah Carey na tayong mga Filipino ay mga unggoy. Kasi, wala tayong sarili, gaya-gaya lang tayo. Nasa Amerika ka na, binigyan ka na ng pagkakataon na kumanta sa Oprah, bakit kumanta ka pa ng kanta ni Celine Dion? Sinabi ni Mariah na mga unggoy ang Filipino, gaya-gaya lang kayo, e, di napatunayan nga, totoo nga.

"Kasi, di ba, what monkeys see, monkeys do. Dapat ang kinanta niya, bakit hindi 'Dahil Sa Iyo'o kaya ay kahit ano, basta kantang Filipino? O kaya Visayan, Ilocano... lalo siyang sisikat sa buong mundo nun," pahayag ni Freddie.

Pero hindi naman talaga napatunayan na sinabi ni Mariah na "monkey" ang Pinoy.

STAYING FILIPINO. Ano kaya ang dapat gawin nina Charice at iba pang Filipino international artists para masabing proud siya sa kanilang ginagawa?

"Kasi, sasabihin ko na naman, katulad ng ginawa ko, e, puro na lang ako," may himig ng pagkabantulot na paliwanag niya.

"Kasi, inalok ako ng mga Kano noon [1980], noong kasikatan ng Anak," pagpapatuloy ni Freddie. "Inalok nila akong doon na tumira sa Amerika, sampung milyong dolyar, guaranteed na income ko in ten years. Sa madaling salita, one million dollars a year, guaranteed, ilalagay sa akin pagkapirmang-pagkapirma ko ng kontrata. Ang kapalit, kaluluwa ko bilang isang Filipino.

ADVERTISEMENT - CONTINUE READING BELOW

"Hindi ko alam na 'yon ang kapalit dati. Nag-recording ako sa Hollywood. Ang mga musikero ko ay puro puti, ako lang ang Filipino doon. May back-up singer akong tatlo, si Teri DeSario [ kumanta ng 'Fallin'] ang isa sa back-up singer ko, si Teri. Sumikat siya sa buong mundo, back-up singer ko lang 'yon kung tinanggap ko yung kontrata. Hindi ko muna tinanggap, nag-recording muna ako ng sample ng international album sa Hollywood. Maganda, Ingles. Marunong din akong kumanta ng Ingles.

"E, di ang ganda, inuwi ko muna 'yong produktong album sa Pilipinas. Pero hindi ako pumipirma, sabi ko ay tingnan muna natin. Pero ang pagkanta ko ng English ay may kapalit 'yon, papayag akong gumawa ng Hollywood album, pero yung kantang 'Anak'at yung 'Alaala ni Ama,' huwag ninyong pakikialaman. Kung ano yung original recording nun, isasama ninyo, 'ika ko doon sa international album na gagawin ko sa Hollywood. Puwede kang mag-demand, e, hindi ka nila didiktahan dahil kailangan ka nila, e, nagko-compromise."

Patuloy niya, "Inuwi ko sa Pilipinas yung album, ang ganda, ipinarinig ko sa lahat ng mga kababayan natin na kaibigan ko, ipinagyabang ko. Sabi ko, 'Heto na yung international album ko.' Lahat ng nakarinig sinabi nila na, 'Freddie, ayan na 'yan, ayan na ang pinapangarap ng lahat ng Filipino na sumikat sa Amerika, ayan na 'yan. Stateside na ang tunog mo, Freddie.'

"Ako naman, proud na proud ako, 'Tama, international na ako talaga.' Ganoon ang feeling ko. Pero 'pag mag-isa na ako sa gabi at matutulog na ako, ang laki-laki ng question mark sa puso at sa utak ko. Naiisip ko kung tama ba ang ginawa ko, tama ba yun? Isang araw, wala akong inimbitang kaibigan, mag-isa lang ako at pinakinggan ko yung album na ginawa ko sa Amerika. Sabi ko, 'Ay, hindi ko gagawin ito.'

ADVERTISEMENT - CONTINUE READING BELOW

"Alam mo kung bakit? Kasi, hindi na ako 'yon, hindi na Filipino, Amerikano na yung nandoon. Kapag hindi sinabing 'Freddie Aguilar from the Philippines,' hindi mo ako mapapagkamalang Filipino. Pati yung tunog, Amerikano na talaga.

"Bumalik ako doon [U.S.], tinakot nila ako na, 'Freddie, you will be forgotten. That's it, that's the end of your career, man. Nobody says no to this kind of offer.' Sabi ko, 'Are you kidding me? I did not say no, I said I cannot do it, because I want to be me.' Sabi ko, 'I'm giving you a choice,' ika ko, 'bring me to Nashville and I will make lampaso...' Sabi ko, ilalampaso ko ang mga country singer ninyo sa Amerika, kaya kong lampasuhin 'yan. Sabi ko ay dalhin ako sa Nashville, doon na lang masaya na ako doon, pero huwag na huwag mong papalitan ang kanta ko, Tagalog. Pero magko-compromise ako, kakanta ako ng English, huwag mo lang talaga akong gawing pop. Pop star na ako, e, ginawa akong pop.

"Anong sabi ko, hindi ko kaya, hindi ko sinabing ayaw ko. Sinong may ayaw ng sampung milyong dolyar, ano ako baliw? Gusto ko rin 'yon, pero hindi naman kapalit ng puso ko. Hindi ko lang pinanghinayangan yung sampung milyong dolyar, talagang maluha-luha yung wallet ko. Pero 'yong puso ko ay ayaw pumayag, e.

"Sabi nila ay malalaos na ako, pero natsambahan ulit natin sa 'Magdalena'at hindi naman pala totoo na malalaos na ako. Sumikat ulit 'yong 'Magdalena,' sa buong mundo ulit. Kung na-promote ko lang iyang 'Magdalena,' baka tinalo pa ng 'Magdalena' 'yang benta ng 'Anak.'

"So bakit hindi ko pinromote? Iyan dapat ang susunod na tanong, di ba? Kasi pinatay si Ninoy Aquino. Sumikat ang 'Magdalena'sa buong mundo at imbes na mag-promote ako sa buong mundo, nandiyan ako sa rally, kumakanta ako ng bagong version ng 'Bayan Ko,' na later on, naging international ulit. So, mali pala 'yong mga sinabi ng mga Kano na malalaos na ako, na makakalimutan na ako ng buong mundo. Dahil lalo akong minahal ng buong mundo, dahil nanindigan pa ako, hindi ko ibinenta yung soul ko at hindi ako naging unggoy. So, hindi ako unggoy na Filipino at maraming hindi unggoy na Filipino.

ADVERTISEMENT - CONTINUE READING BELOW

"So, sabi ko rin, si Gary Valenciano, hindi siya sisikat kung gagayahin niya lang si Michael Jackson. So, 'ika ko, kung gusto niyang sumikat sa buong mundo, iyong energy niya, iyon ang ilagay niya sa plaka niya. Kasi, nakita n'yo naman si Gary, kahit nakaupo lang sa isang sulok ay may energy talaga yung tao.

"And isa pang masasabi ko, napatunayan natin na kaya pala nating gumawa ng kantang pang-universal, nandiyan yung Anak, e," mahaba niyang kuwento.

ANAK. Thirty one years ago na nang pasikatin niya ang awiting "Anak," pero ano kaya ang maituturing niyang pinakamalaking kontribusyon sa music industry?

"Hindi ko na kailangang sabihin, e, alamin n'yo na lang," sagot ni Freddie. "Mahirap kasi kung sa akin pa manggaling, e, sa dami ko nang nagawang kanta, mahirap kung sa akin manggaling."

Pero ano ba ang masasabi niyang nagawa sa kanya ng kantang "Anak"? Sa pagkakaalam ba niya ay nalagpasan o napantayan man lang ito ng iba?

"Yung 'Anak'is recorded in 27 languages, inilabas sa 53 countries. In fact, sumikat yung Tagalog, tapos mayroong mahigit 100 versions sa buong mundo. Tapos sa Who Wants To Be A Millionaire na game show, sabi, ang ibinenta raw ng 'Anak'is 30 million copies. Iyon ang sabi nila, pero puwede mong i-research.


"Ang alam ko noong 1980, 3.4 million ang sales, noong panahon na 'yon. Kaya maaaring totoo yung 30 million, kasi hindi naman tumigil ang benta ng 'Anak,' hanggang ngayo'y bumebenta pa rin," pahayag ng singer.

So, sa kinita pa lang niya sa "Anak" ay puwede na siyang buhayin sa habambuhay?

"Kung binayaran ako ng Vicor at ng BAMI (Bayanihan Music Incorporated), kasi hanggang ngayon ay nasa korte pa rin kami, e," sagot ni Freddie.


VEHEMENT ANTI-PIRACY. Naibulalas din ni Freddie ang kanyang damdamin sa mga music pirate.

"Puwede kaming maglabas ng album anytime," sabi niya. "Pero ipakiusap muna natin sa gobyerno na mapigil nila yung mga pirata. Para naman mayroon kaming lakas ng loob na mamuhunan at gumastos ng milyon. Yun lang ang hindrance, yung mga pirata lang, kaya ayaw ko munang maglabas ng album.

ADVERTISEMENT - CONTINUE READING BELOW

"Mabawasan man lang sana. Kasi noong araw, noong 1978, may pirata na rin noon. Kung hindi ako nagkakamali, 25 percent ay pirata na, e. Ngayon, baligtad na, wala na kaming percent, pirata na lang. Wala nang naiwan sa amin.

"A writer is always a writer," patuloy ng Pinoy folk rock icon. "Kaya lang, hindi ako naglalabas ng kanta dahil intellect namin yung ibinibigay namin, pagkatapos kapag lumabas yung intellectual property namin sa tindahan, kinukurakot ng pirata. Kung ikaw, ninanakaw yung anak mo ng kung sino-sino, mag-aanak ka pa ba o hindi mo na lang palalabasin ang anak mo ng bahay? So, iyon ang masakit. Kaya sana kayong mga writer, tulungan ninyo kaming i-advocate na yung mga tao ay huwag bumili ng pinirata, or yung gobyerno natin, magbigay ng higit na mas mabigat na parusa.

"I was the first one who asked the Senate nang ipinatawag kami noon sa hearing sa Senate, 'Please involve piracy as an economic sabotage.' Kasi 'ika ko, sa isang mahirap na bansa, ang 100 million pesos a year na nawawala sa mga pirata, that's already an economy. Kaya, bakit hindi nila isinasama ang piracy sa economic sabotage?

"Bakit gusto kong isama sa economic sabotage ang mga pirata? Kasi, kapag naging suspect kang pirata, dadamputin ka ng pulis at diretso ka sa kulungan, walang bail. Pero nagtataka ako, bakit ayaw gawin ng gobyerno 'yon. Bakit, kasangkot ba sila sa pirata? Kakampi ba nila yung mga record company na namimirata?

"Masyado na kasing high-tech ang pamimirata, pero ang batas natin ay low-tech pa rin. Kaya dapat bigatan ang parusa talaga sa mga pirata," pahayag niya.

Di ba't may ginagawa naman ang Optical Media Board chairman na si Edu Manzano upang puksain ang piracy rito sa Pilipinas?

"Wala namang ngipin ang hawak ni kasamang Edu, e," sagot ni Freddie. "Kahit itanong mo sa kanya, aaminin niya sa iyo na wala naman silang ngipin, wala silang police powers. Kaya dapat ay bigyan sila ng police powers para may kapangyarihan talaga sila."

ADVERTISEMENT - CONTINUE READING BELOW

Pero ngayon may napasa na rin daw bill ukol dito mula kay Senator Bong Reviila?

"Dapat naman. Pero let's see, kasi mayroon na rin tayong intellectual property protection, pero hanggang ngayon ay hindi pa rin namin natitikman, wala pa rin dahil nga pinipigilan ng pagbenta ng plakang legal, puro pirata ang kumikita. So, ano pa rin ang makukuha mo sa pagiging intellectual property owner mo kung wala kang bentang legal? Ganoon pa rin.

"Tuwang-tuwa rin kami noon nang magkaroon ng intellectual property protection, pero wala ring saysay dahil hindi nga bumebenta yung mga legal."


"BUHAY AY LANGIT SA PILING MO." Kung i-request siyang kumanta ng ating National Anthem, papayag ba siya?

"Hindi ako kakanta," sagot ni Freddie. "E, malaki ang singil ko, mababayaran ba nila iyon? Kung babayaran nila ako, kakanta ako, bakit hindi?"

Susundin ba niya yung tamang kanta ng "Lupang Hinirang"?

"Hindi ko masasabi, kung ano ang pakiramdam ko pagtayo ko doon, ako lang ang nakakaalam nun. Yun ang lalabas sa bunganga ko, hindi ko puwedeng planuhin. Kasi artist ako, e. Ang artist kasi, pagtayo ko doon at heto na, napakiramdaman ko na ngayon na, 'Teka, niloloko ninyo kaming mga Filipino, 'etong para sa inyo.' Hindi ba? Iyon yung sinasabi kong damdamin kong lalabas. Hindi mo puwedeng gitarahan yung National Anthem, mas maganda na acapella.

"Pero hindi n'yo alam ang sinasabi ko ukol sa 'Lupang Hinirang'natin, 'no?" balik-tanong niya. "Hindi n'yo alam na kini-criticize ko 'yan, 'no? Kaya magkakampi kami ni Julie Yap Daza sa pag-criticize ng 'Lupang Hiirang.'

"Okay, sasabihin ko sa inyo na kung masusunod lang sana ako, ang gusto kong ending ng 'Lupang Hinirang'ay ...buhay ay langit sa piling mo, hanggang doon lang at wala na yung .... ang mamatay ng dahil sa iyo. E , di kayo na lang ang mamatay, ako ayaw ko. Gusto ko, buhay ay langit sa piling mo. Kasi, bakit? Papatayin ko yung kalaban ko at hindi ako magpapapatay sa kalaban ko. Bakit? Kaya api-apihan ang mga Filipino, inaapi tayo kahit saan tayo pumunta. Dahil doon, may kinalaman din 'yon sa mga pinaggagagawa natin sa sarili natin, sa buhay natin. Kailangang ipakita mo rin na hindi ka ganoon.

ADVERTISEMENT - CONTINUE READING BELOW

"Hayun na nga, isinulat ko na 'yan sa kanta, pero hindi rin nangyari. Naglabas ako ng album, ang title ay Juan dela Cruz. Kung sinunod ng buong Pilipinas at ng gobyerno natin yung buong plaka kong Juan dela Cruz, wala nang nangungurakot ngayon at wala nang tumatawid sa di tamang tawiran at wala nang nakalagay doon na, 'huwag tatawid, nakamamatay.' Pero mayroon pa ring tumatawid, dala-dala pa yung anak, nakikipagpatintero sa sasakyan. Kita mo? Damay-damay yun kaya hindi tayo umuunlad. Yung mga kaunti-unting ugali natin na ang tingin natin ay nakakalusot naman tayo, kasama lahat 'yon, e. Pati yung pagkanta ng kanta ng kung kani-kanino, e, binigyan ka na ng tsansa, e.

"Mayroon pa akong napanood sa Las Vegas," patuloy niya, "dahil pinilit ako ng promoter ko na manood dahil libre raw at naipangako raw niya na, 'Kapag nandito si Freddie, hihilahin namin, dahil kilala naman ni Ka Freddie ang mga artist na 'yan.' Sa madaling-salita ay hindi ko na tinapos ang show. Pero hindi ko na sasabihin kung sino dahil ang mga kinanta niya... Ang dami nating kanta na sikat sa mga milyun-milyong Filipino, pero kung ang kanta ay wala namang kapili-Filipino sa kinakanta, sabi ko ay niloloko tayo ng mga ito. Nandito pa naman ako, naglolokohan tayo. Kaya umalis kami in the middle of the show," tuluy-tuloy na esplika pa niya.

SOCIAL CONSCIOUSNESS IN ENGLISH. Lahat ba ng nasulat niyang kanta ay puro Tagalog, walang English?

"Kapag sinabi ko namang ganyan, magsisinungaling naman ako niyan," sabi niya. Kasi tayong mga Filipino, ipinanganak tayong dalawa ang language natin—Tagalog, English at pati pa yung dialect natin. Kasi second language na natin ang English dito, kaya noong una akong nagsusulat ng mga kanta ay puro English ang isinusulat ko. Kasi, wala akong inspirasyon sa TV at radyo na Tagalog.

ADVERTISEMENT - CONTINUE READING BELOW

"Alam mo naman, noong 1953 ipinanganak ako, noong lumalaki ako, ang mga sikat ay sina Mang Fred Panopio, si Victor Wood, si Aling Pilita [Corrales], yung Ruben Tagalog. Iyan, Tagalog ang kinakanta, kaya nga Ruben Tagalog, e. So, ang mga sikat na sikat, mga English ang kinakanta.

"So, nagsusulat ako noong umpisa, when I was 14 na di pa ako naggigitara. Pero nagsusulat na ako ng kanta, kasi may gitarista akong barkada namin at gumagawa-gawa na ako ng kanta, puro English ang sinusulat ko. Ang unang-unang composition ko noong 14 years old ako, ang title ay 'The Pusher.' Kasi, nag-start na rin yung marijuana pa lang noong araw at nakikita ko na ang masamang epekto.

"So, ganoon na akong magsulat, parang yung social consciousness ko ay nandoon na at the age of 14 pa lang. Nakikita ko kasi noon yung mga pusher sa mga kalye sa amin na tinatakot yung mga nag-aaral kapag hindi bibili," pagtatapos ni Freddie.


WE RECOMMEND


FROM THE SUMMIT MEDIA NETWORK


SPONSORED CONTENT


COMMENTS

Loading comments

THIS JUST IN