"Breach of contract" at "kawalan ng tiwala" ang mga dahilan kaya dalawang malaking kumpanya na iniendorso ng model na si Phil Younghusband ang nagdeklara kamakailan ng pagtigil ng suporta sa kanya.
May kinalaman sa good moral character at attitude ng former Celebrity Duets contestant at footballer ang withdrawal of support ng multi-million brands.
Reportedly, nakarating sa mga advertiser na lumabag si Phil sa kontrata dahil tumanggap siya ng event ng kalabang produkto at gumagawa siya ng mga bagay na kasiraan sa kanyang mga endorsement at malinis na image ng isang athlete. Nag-back out din ang isang leading food chain sa pagkuha kay Phil bilang endorser dahil sa mga kontrobersiya na kanyang kinasasangkutan.
Sinubukan ng PEP (Philippine Entertainment Portal) na kunin ang panig ni Phil sa pamamagitan ng kanyang manager na si Joyce Ramirez, pero hindi ito sumagot.
Napag-alaman ng PEP na hindi na rin daw in good terms sina Phil at Joyce dahil nag-e-entertain ang footballer ng business transactions na lingid sa kaalaman ng kanyang manager. Breach of contract ang ginagawa ni Phil dahil may kontrata siya sa talent management agency ni Joyce.
Reportedly again, hindi na nakikipag-usap si Phil kay Joyce kaya apektado ang kanilang commitment sa iba pang mga advertiser na kumuha sa serbisyo ng Fil-Brit football player.
Dahil hindi nakipag-usap si Joyce sa PEP, hindi niya rin nasagot ang isyu tungkol sa napabalitang malaking utang na pera sa kanya ni Phil.
Si Joyce ang namuhunan at nagsali kay Phil sa Celebrity Duets. Noon pa man, balita na ang malaking ginastos ni Joyce sa text votes para magtagal si Phil bilang contestant ng Celebrity Duets Season 2. Dahil din sa pagsali ni Phil sa Celebrity Duets kaya sumikat si Phil at kinuha ng mga malalaking kumpanya.
GETTING PHIL'S SIDE. Nitong January 6, isang email ang natanggap ng iba't ibang patnugot ng magazines mula sa isang "Phil Younghusband." Tungkol ito sa isang proyekto ng football star. Isinama rin niya ang pangalan ng manager bilang contact person para sa iba pang detalye.
Kasalukuyang tinatawagan ang mga numbers na inilagay ni Phil sa email. Nag-ring ito ng ilang beses subalit walang sumagot. Napagpasyahan naming magpadala rin ng messages.
At kung handa na si Phil na magsalita, bukas ang PEP para dinggin ang kanyang pahayag.