Minsan na namang napatunayan ang kasabihang "in showbiz, anything is possible."
Muling nagkasama sina Gabby Concepcion at Sharon Cuneta at ang kanilang anak na si KC Concepcion sa isang pambihirang pagkakataon. Ito ay naganap sa taping ng Sharon, ang weekly show ng Megastar, sa Dolphy Theater ng ABS-CBN kagabi, June 7. Guests sina Gabby at KC sa show ni Sharon bilang bahagi na rin ng promotion ng first movie nila together, ang I'll Be There ng Star Cinema.
Para sa mga hindi nakakaalam, dating mag-asawa sina Gabby at Sharon ngunit nagkahiwalay rin pagkatapos ng ilang taon. Noong bata pa si KC ay nagdesisyon si Gabby na manirahan sa U.S. sa loob ng 13 years.
Noong 2008 ay bumalik ng Pilipinas si Gabby at binalikan ang pag-arte. Noon ding taon na 'yon ay pinasok na nang tuluyan ni KC ang showbiz. At ngayon nga ay magkasama na ang mag-ama sa isang pelikula.
THE REUNION. Sa taping ng Sharon kagabi, hindi magkamayaw ang sigawan at tuksuhan ng mga tao sa loob ng Dolphy Theater sa tuwing magtatabi at magbibitaw ng jokes sina Gabby at Sharon sa isa't isa. Masayang-masaya naman na nanoood at nakikitukso lang si KC sa mga magulang.
Pagkatapos ng taping ay nagkaroon ng pagkakataon ang PEP (Philippine Entertainment Portal) na makausap si Gabby. Hiningan namin siya ng pahayag sa muling pagsasama nila sa isang show ng kanyang ex-wife at sa pagiging emosyunal ng anak na si KC sa pagsasama nilang ito.
"Ako, I enjoyed it also," nakangiti niyang sagot. "I think this is the beginning of something good. For more than 13 years na wala ako, actually more, mga 20 years yata, hindi kami nag-uusap ni Sharon. Today's special for all of us, for the three of us kasi nga it turned our lives around.
"We were on the set and she [KC] started to cry. I felt that this was something for her, not only because we did I'll Be There, but for me and Sharon to be together in front of her that she hasn't seen for many, many years. Now that we're talking... Kasi when I was in the States, hindi kami [him and Sharon] nag-uusap talaga, she [KC] saw that. Now that we're all here in the Philippines, and she saw us together finally in the same show, it really makes her really feel good that we're already okay," sabi ni Gabby.
A "FAMILY" MOVIE. Since nauna nang nagawa ang I'll Be There nina Gabby at KC under Star Cinema, sa pagsasama nilang tatlo sa Sharon, marami ang nagsabi na mukhang posible na talagang masimulan ang pelikulang pagsasamahan nilang "pamilya."
"That's what I heard," pagkumpirma ni Gabby. "Sinabi nga ni Sharon kanina sa show niya. So, nagulat din ako na mayroong movie. Speculations siguro, people ask me, wala naman akong masagot. It would be nice kasi maraming Sharon-Gabbby ang nagtatanong kung puwedeng gumawa kami ng pelikula. Sabi ko nga, yeah, it's a nice dream, pero we don't know if it's ever gonna happen. So let's see."
Gabby also expressed his happiness for having KC as his eldest daughter at ang kagustuhan talaga nitong makagawa sila ng pelikulang mag-ama.
"Ang ganda ng feeling kasi she's my daughter and not all parents would have blessings like this, especially KC. Kasi I saw her and she wanted to do a movie. We had a talk about that and I really feel good that she wants to do a movie with her Papa. So, that's really special for me, and even more special for her because she's the one who really wanted to do it. Parang gift na rin yun para sa kanya because natupad.
"The studio wanted to do it. It was okay for us to do a movie. It was granted. I am hoping that it would touch a lot of hearts, may message yung movie. In fact, we are in the process of making others meet their parents, of people who have lost or never seen their parents before. Siguro, we became a tool to that event," saad ni Gabby.
Ipalalabas ang guesting nina Gabby at KC sa Sharon sa susunod na Linggo, June 13.