"Once an actor, always an actor" ang sabi kay Aiko Melendez ng PEP (Philippine Entertainment Portal) at ng iba pang writers na dumalaw sa taping ng Basahang Ginto kahapon, August 25, sa Victoria Place, Potrero, Malabon.
"True," ang nakangiti namang pagsang-ayon ni Aiko. "Na-realize ko na I missed acting pala for nine years, nang una akong mag-taping dito, dahil drama itong Basahang Ginto. Ito pala 'yong iniwan ko na babalikan ko rin."
Matagal bago napasabak muli sa tunay na aktingan si Aiko, bagamat paminsan-minsan ay lumalabas naman siya sa TV at maging sa pelikula (Yaya & Angelina: The Spoiled Brat Movie).
CARLA'S MOTHER. Dito sa Basahang Ginto ay ginagampanan ni Aiko ang role bilang si Rosenda, dating artista at siyang tunay na ina ni Orang (played by Carla Abellana). Napapanood na siya for more than a week sa naturang afternoon soap ng GMA-7.
Tinanggap ba niya agad ang offer na maging ina ni Carla sa soap?
"Actually, nag-second thought ako nang makarating sa akin ang offer through my manager, si Tito Boy [Abunda]," sagot ng 34-year-old actress. "Inisip kong my eldest, si Andrei, is only 11 years old, tapos ang anak ko si Carla [24 years old]. Pero sinabi nila ire-revise nila ang script, pero hindi pa rin ako kumbinsido.
"Tinanong ko sila kung ano ba ang makakapagpabago sa akin para tanggapin ko ang offer nila. Nang sabihin nilang si Direk Joel [Lamangan] ang nagdidirek ng Sine Novela, yun na, hindi na ako nag-isip pa. I accepted it na."
Dagdag niya, "I've worked with Direk Joel sa movie namin noon na Filipinas [2003] for Viva Films, at siya rin ang nagdirek ng Aiko Drama Special [her defunct drama anthology on ABS-CBN]. Kaya sabi ko, I'm blessed to work with Direk Joel again."
Kumusta naman ang first taping day niya sa Basahang Ginto?
"Very warm ang pagsalubong nila sa akin, naroon pa rin ang respeto nila," sagot ni Aiko. "Kahit first time ko lang nakatrabaho sina Geoff [Eigenmann] at Carla, nakita kong sila na siguro yung next generation ng talagang mga artista.
"Nakita ko kasi kay Carla, dahil siya ang madalas kong kaeksena, kung gaano siya ka-hardworking. Quiet lang siya at nag-aaral ng script. Pasensiyoso siya, wala siyang reklamo kahit palipat-lipat siya ng location.
"May mga nakita na kasi akong artista na hindi naman yata talaga artista, dahil kahit bago pa lang sila, may attitude na. Paano na 'yon, kapag talagang sumikat na siya, mas mag-a-attitude pa siya. Mabibilang mo talaga ngayon kung sino ang mga tunay na artista."
WORKING WITH HER PEERS. Ready na ba siyang makipagtrabaho sa mga nakaalitan niya noon, gaya ng ex-husband na si Jomari Yllana at si Ara Mina?
"Oo naman, bakit hindi?" sambit ni Aiko. "Kami naman ni Jom, open ang communication namin dahil sa anak naming si Andrei. Nagtambal na rin kami sa movie na Yaya & Angelina.
"Come to think of it, ngayon ko lang na-realize na ten years na yata 'yong issue sa amin ni Ara. Nakapag-move on na ako for a long, long time. Siguro hindi pa lang talaga kami nabibigyan ng chance na magkausap talaga. Kahit noong election, wala naman kaming dapat pag-awayan, pinag-away pa rin kami. Noong kampanya, kahit halos magkalapit lang kami, hindi rin naman kami nagkausap.
"Sa ngayon, freelancer ako kaya may chance na makatrabaho ko sila. Noon nga, sinabi ni Mother Lily [Monteverde] na igagawa raw niya kami ng movie nina Ruffa [Gutierrez] at Carmina [Villarroel], pero hindi ko na alam kung bakit hindi natuloy. Saka kung gagawa kami ng project nina Jom at Ara, sana hindi naman too close to reality!" natatawang wika ni Aiko.
Sina Ruffa at Carmina ay nakasama noon ni Aiko sa launching film nila sa Regal Films na 13, 14, 15.
Wala ba siyang balak na mag-sign ng contract sa alinmang network?
"Nakapag-guest na ako noon sa 5-Star Special ni Ruffa sa TV5. May ginawa rin akong mini-series with Lani Misalucha, Candy Pangilinan, at Miriam Quiambao sa TV5, and I heard sa September 8 daw 'yon mapapanood. Siguro, magpapatali lang ako sa isang network kung maganda talaga ang project na ibibigay sa akin," sabi niya.
So, tuluy-tuloy na ang pagbabalik-showbiz niya?
"Yes, sana tuluy-tuloy na ang pag-arte ko," sagot niya.
ON POLITICS. Hindi ba niya nami-miss ang buhay-pulitika? Noong nakaraang May 10 elections ay natalo si Aiko bilang kandidato para vice- mayor ng Quezon City. Ang nanalo ay si Joy Belmonte.
"I'm enjoying being an ordinary citizen ngayon," sabi ni Aiko. "Mas may time na ako with my kids, sina Andrei at Marthena. Ayun, kapag may work ako, si Mommy [Elsie Blardony] ang tumitingin sa mga anak ko. Yun namang mga loyal supporters ko, puwede ko naman silang tulungan sa abot ng kaya ko."
May balak pa ba siyang balikan ang pulitika?
"Kung ngayon ninyo ako tatanungin, honestly, I'll think about it 100 times," sagot niya.
Tungkol naman sa relasyon nila ng boyfriend niyang si Patrick Meneses, matipid na sinabi ni Aiko na "okay" sila.