Dismayado si Vice President Jejomar Binay sa format ng Pilipinas Debates 2016 o unang arangkada ng presidential debates, na inorganisa ng GMA Network at Philippine Daily Inquirer.
Ito ay sa kadahilanang imbes na pag-usapan ang track record ng bawat presidential candidate ay sumentro raw ito sa usapin ng political dynasty at mga ari-arian ni Binay.
Pahayag ng bise-presidente, “Aba, ang tinanong naman sa akin ay lupa kong namana at yung lupa kong nabili.
“Yung aking si Miriam [Defensor-Santiago] na ka-partner, tinanong ng dynasty. E, wala naman hong track record na tinanong, ha.”
Taliwas umano ito sa napagkasunduang topic tungkol sa karanasan sa paglilingkod-bayan ng bawat presidential candidate.
Base ito sa talumpati ni Binay sa kanyang political rally sa Batangas noong Miyerkules, February 24.
Hindi kaila sa publiko ang kasong plunder na isinampa laban sa kanya ng Office of the Ombudsman.
Kaugnay nito ay kinukuwestiyon din ang pag-upo sa puwesto sa gobyerno ng ilang kapamilya at kamag-anak ni Binay.
TOO MANY COMMERCIAL GAPS. Inalmahan din ni Binay ang pagkakaroon ng commercial gaps sa tatlong round ng naturang presidential debate.
Imbes na magkaroon ng pagkakataon ang mga kandidato na ilatag ang kanilang plataporma ay nauubos lang umano ang oras sa patalastas.
Reklamo pa ni Binay, “Ang aking gagawin, susulat ho ako sa Comelec, 'Puwede ba ikaw na lang ang gumastos doon?'
“Kasi ang naunang interes, yung kikitain sa pagpapalabas, dadami mag-i-sponsor.
“Kulang na kulang naman ho sa oras na matugunan ang mga dapat maharap ng mga kakandidato.”
Sa kabilang banda, nilinaw ng pamunuan ng GMA na bago sumalang ang limang presidential candidates ay ipinaalam sa mga ito ang mga isyung tatalakayin sa debate.
Narito ang official statement ng GMA hinggil sa reklamo ni Binay, na may petsang February 25:
“We respect his opinion about the Presidential Debate on Feb. 21, 2016 but GMA wishes to clarify that it was made clear to the Binay team and the other presidential candidates' teams what subjects would be discussed during the debate.
"GMA confirms that none of the candidates were informed of the specific questions asked during the Debate.”