Masaya sanang uuwi si Krizza Neri sa kanyang hometown sa Cagayan de Oro matapos niyang makuha ang titulong first-ever Protégé Grand Winner.
Pero, ayon sa report ng Startalk TX noong Huwebes, iba na ang dinatnan ni Krizza matapos hagupitin ng bagyong Sendong ang bayang kanyang kinalakihan.
"Nakamit ko yung victory ko, pero yung mga kababayan ko naglukuksa, malungkot, sobrang devastated sila.
"Nakita ko nga yung mga bahay na nasira. Sobrang tragic talaga yung nangyari dito," patungkol niya sa kanilang bayan.
Pahayag pa niya, "Sobrang na-shock ako dahil nga sa nangyari dito."
Sa pag-uwi ni Krizza, kasama niya ang kanyang mentor na si Aiza Seguerra, na nakipag-coordinate sa Philippine National Red Cross upang maghatid ng tulong sa mga nasalanta ng bagyo.
Matapos tumulong sa Operation Bayanihan ng Kapuso Foundation, ang ilang kaanak naman ni Krizza ang kanyang tutulungan.
"Yung lolo ko po kasi, yung bahay nung uncle ng mama ko, yung bahay nila, by the river.
"'Tapos yung place na yun, sobrang binaha talaga, so nawala... washed-out talaga yung mga bahay.
"Hindi ko na po mahagilap yung bahay nila kasi nga po sirang-sira lahat.
"'Tapos yun nga po, hindi ko pa po alam kung paano sila makakapag-start over.
"Makapag-start ng bagong buhay, pero for sure po, tutulungan ko sila."
MARIA ISABEL LOPEZ. Bukod kay Krizza, ilang Kapuso celebrities din ang pumunta ng Cagayan de Oro para maghatid ng tulong, tulad ng Survivor Celebrity Doubles Showdown castaway na si Maria Isabel Lopez.
At ayon kay Maribel, na tawag din kay Maria Isabel: "I was born here in Cagayan de Oro.
"Nakakalungkot lang na nakita ko kung ano ang devastation na nangyari dito.
"Pero, naniniwala ako na ang mga Cagayanon, matibay, malalakas, tunay na survivor.
"Kaya anuman ang problema, kaya natin ito!"
JENNICA GARCIA. Tumulong din ang young actress na si Jennica Garcia, ang anak ng mahusay na character actress na si Jean Garcia.
"Hindi na ako nagdalawang-isip kasi na-Ondoy rin kami dati ni mommy.
"So, alam ko yung pakiramdam ng nabaha, lahat ng hirap, lalo pa ngayon Pasko."
MARVIN KEIFFER. Ang Survivor castaway at tubong Cagayan de Oro rin na si Marvin Keiffer ay naghatid naman ng tulong, kahit maging ang pamilya niya ay direktang naapektuhan ng trahedya.
"We lost land. We lost some animals.
"Pero yung ibang tao, nawala yung buong bahay, yung lahat ng gamit nila.
"So, I'm still thankful na hindi masyadong malala yung nangyari sa amin, and I'm here to help."
MARK BAUTISTA. Tubong-Cagayan de Oro rin ang singer na si Mark Bautista, at sa pamamagitan ng kanyang Twitter account ay patuloy pa rin siyang humihingi ng tulong para sa kanyang pamilya at mga kababayan.
"Can't wait to go home. Everyone's sick!
"Please pray for my family.
"Nag-dry-up na raw ang putik sa Cagayan de Oro and maalikabok na.
"[May] 200,000 estimated monetary donations in less than five days.
"Salamat sa lahat ng tumulong.
"Makakarating ito lahat sa mga nagangailangan," pagbanggit pa ng nalulungkot na singer.