Maituturing na blessed ang Kapuso tween female actress na si Barbie Forteza nitong taong 2011.
Naging very busy kasi siya sa kanyang showbiz career.
Sunud-sunod ang mga naging TV projects ng 14-year-old actress sa GMA-7, with shows like Nita Negrita, Reel Love Presents Tween Hearts, at ang ipinapalabas pa ring Ikaw Lang Ang Mamahalin.
Kumita rin ang mga pelikula niya under GMA Films na Tween Academy: Class of 2012 at ang horror film na The Road.
"Kaya po sobrang thankful ako sa lahat ng mga blessings na dumating sa akin, lalo na when it comes sa career ko.
"Sobra-sobra po akong nagpapasalamat sa lahat-lahat.
"Siyempre po, kay God, na siyang may dahilan kung bakit may mga blessings sa buhay ko, at sa GMA po, dahil sa tiwala at sa pag-aalaga nila sa akin," pahayag ni Barbie sa interview sa kanya ng PEP.ph (Philippine Entertainment Portal) kamakailan.
Nitong nakaraang Pasko, bilang selebrasyon—at bakasyon na rin—ay umuwi sila ng pamilya niya sa Carmona, Cavite.
"Taga-doon po kasi ang family ng father ko, kaya doon kami nag-Christmas," ani Barbie.
EXCHANGING GIFTS WITH JOSHUA. Hindi siyempre makukumpleto ang isang interview kay Barbie nang hindi siya natatanong tungkol naman sa ka-love team niyang si Joshua Dionisio.
Ano ang naging Christmas gift ni Joshua sa kanya?
"Binigyan niya po ako ng Hello Kitty na seat cover," nakangiting sagot ni Barbie.
Ano naman ang iniregalo ni Barbie sa 17-year-old na ka-love team?
"Binigyan ko po siya ng gitara as a birthday gift. Birthday po kasi niya last December 14.
"And ang Christmas gift ko naman po sa kanya ay unan po, iyon po," nakangiting sinabi pa ng dalagitang tubong-Laguna.
PLANS FOR NEW YEAR'S EVE. Ano naman ang plano nila sa nalalapit na pagpapalit ng taon?
"Uuwi naman po kami sa Biñan, Laguna, sa mother side naman po."
Dati ay sa Biñan nakatira ang buong pamilya ni Barbie, pero mula nang nakabili siya ng condominium unit sa Quezon City ay doon na sila umuuwi.
"Mas malapit po kasi.
"Para hindi po hassle sa traffic kapag may shooting or taping ako, kaya sa Quezon City na po kami umuuwi.
"Instead na mag-uwian sa Laguna, tulad noong nagsisimula pa lang po akong mag-artista," paliwanag ni Barbie.
TO BE A GOOD SISTER. At kapag pumapasok ang Bagong Taon, nakaugalian na ng karamihan sa atin ang gumawa ng New Year's Resolution.
Ano nga ba ang kay Barbie?
"Bilang New Year's resolution ko po, I will try my best po to be very good to my sister.
"Kasi po, baka pumunta na siya sa Amerika next year. Baka po doon na siya mag-stay for good," may-bahid na lungkot na pahayag ng dalaginding.
Mami-miss daw ni Barbie ang ate niya, lalo pa at dalawa lang silang magkapatid.
"Opo, siyempre po, pero desisyon po niya iyon, e.
"At kung iyon po ang sa tingin niya ay mas makakabuti sa kanya, susuportahan ko po ang desisyon niya."
Alam naman din ni Barbie na magkikita pa rin sila ng kapatid niya.
"Puwede naman po na pasyalan ko siya doon, or siya ang bibisita dito," aniya pa.
Bilang pagwawakas sa panayam sa kanya, hinilingan ng PEP si Barbie ng New Year's wish.
"Good health po para sa akin at sa family ko, at sana po, more projects for me sa TV at sa movies."