Senator Tito Sotto claims he is victim of "cyber-bullying"; blasts his critics

Ito ang ibinigay na mensahe ni Senator Tito Sotto sa kanyang mga kritiko sa isang privilege speech sa Senado kaninang hapon: “Kahit mukha akong walang pinag-aralan kung ikukumpara sa mga pinag-aral nila, at hindi kasing dunong nila, ang mahalaga ay ang ipinaglalaban ko. Malinis po ang hangarin ko na ipaglaban ang sanktidad ng buhay. Naniniwala po ako na kahit kailanman, wala kahit isa sa atin ang may karapatan na ipagkait itong mundong ating ginagalawan. Ito po ay hindi sa ati


Nagbigay ng privilege speech si Senator Vicente “Tito” Sotto III kaninang hapon, August 29, sa Senado, upang ipagtanggol ang sarili mula sa isyung plagiarism na ibinabato sa kanya.

Ito ay nag-ugat sa akusasyong kinopya niya mula sa isang blog at iba pang online articles ang ilang bahagi ng "contra en turno" ng Senate Majority Floor Leader kaugnay ng isinusulong na Reproductive Health Bill.

Ngunit taliwas sa inaasahan ng iba na hihingi ito ng paumanhin sa nagawa ng kanyang speech writers, nanindigan ang actor-politician sa kanyang pagsalungat sa RH Bill.

Hinaing ni Senator Sotto, “Ako yata ang kauna-unahang senador ng Pilipinas na naging biktima ng cyber-bullying.

“Mula sa blogs, Facebook, at Twitter, ginawa akong sentro ng mga mapanira at malisyosong atake ng iba’t ibang tao, lalo pa ng mga sumusuporta sa RH Bill.”

Paniniwala pa ng actor-politician, “Bahagi siguro ito ng kanilang istratehiya, lalo pa’t may milyun-milyon silang pondo.

“’If you can’t kill the message, kill the messenger’—mukhang ganito ang ginagawa ng aking mga detractors.”



NO LAW AGAINST PLAGIARISM. Ipinagtataka rin daw ni Senator Sotto na wala siyang nakuhang sagot mula sa kanyang kritiko tungkol sa mga rasong inihayag niya kung bakit tutol siya sa RH Bill.

Bigla raw nabaling ang atensiyon ng lahat sa isyu ng plagiarism.

Pagkatapos ibigay ang kahulugan ng salitang “plagiarism” mula sa iba’t ibang diksyunaryo ay ipinaalala ni Senator Sotto na wala raw krimen ng plagiarism sa Pilipinas.

“Kahit hanapin ninyo pa sa Revised Penal Code, sa Intellectual Property Code, at maging sa Special Penal Laws, wala kayong makikitang krimen ng plagiarism.

“Pinakamalapit na sa maaaring pag-isipan ay copyright infringement, na hindi naman tatayo ayon sa mga abogado dahil walang paglabag sa alinman sa mga copyright o economic rights na nakasaad sa Section 177 ng Intellectual Property Code,” saad ng senador.

May mensahe ring ipinarating si Senator Sotto sa kanyang mga detractors:

ADVERTISEMENT - CONTINUE READING BELOW

“Para sa mga naninira at humuhusga sa akin sa Facebook, Twitter, blog, at pati na rin sa diyaryo, ito po ang masasabi ko.

“Kahit mukha akong walang pinag-aralan kung ikukumpara sa mga pinag-aral nila, at hindi kasing dunong nila, ang mahalaga ay ang ipinaglalaban ko.

“Malinis po ang hangarin ko na ipaglaban ang sanktidad ng buhay.

“Naniniwala po ako na kahit kailanman, wala kahit isa sa atin ang may karapatan na ipagkait itong mundong ating ginagalawan. Ito po ay hindi sa atin.”



BETTER TO BE A CLOWN. Hindi rin nakaligtaan ng senador na paalalahanan ang mga tumutuligsa sa kanyang pagiging bahagi ng noontime show na Eat Bulaga!:

“Ang aming programa sa telebisyon, yung pong Eat Bulaga! kung saan kasama ko po ang aking kapatid na si Vic at si Joey.

"Pati ang partisipasyon ko ay pinipintasan nila. Tinatawag pa akong payaso.

“Mr. President, mas gusto ko nang maging payaso at pasayahin ang mga tao kesa sa kanila na nagsasabi ng masama laban sa kapwa.

“Kami po sa Eat Bulaga! ay daan-daang tao ang natutulungan, libu-libo, at milyun-milyon ang nasisiyahan at tumatangkilik.

"Samantalang itong mga tumutuligsa at namimintas sa akin, ilan kaya ang kanilang natutulungan? Kung meron man?

“Ok sa aking yung marunong na tao, pero ang nakakatakot yung ang akala marunong siya, yun pala marunong lamang manira ng kapwa.

“Ano pa nga bang magagawa natin, kung hindi ipagdasal na lamang sila.

“Ang mahalaga ay kung ilan ang ating natulungan at hindi ang ating nasiraan.”



JOEY’S POEM. Sa huling bahagi ng kanyang talumpati ay binasa ni Senator Sotto ang huling dalawang talata ng tula na ginawa ng co-host at kabigang si Joey de Leon tungkol sa isyu ng pagkopya:


Eh ’di wala nang titingin sa katalogo,
Ipagbawal mga sumusunod sa uso,
Mga impressionists ipakulong na ninyo,
Pati na rin si Willie Nepomuceno.

ADVERTISEMENT - CONTINUE READING BELOW


Ang masama lamang pagdating sa gayahan
Ay yaong masasamang asal ang tularan
At kopyahin ang pera at lagda ninuman
At gayahin ang pilay at may kapansanan.

Sa kabuuan ng kanyang privilege speech ay hindi nabanggit ni Senator Sotto ang pangalan ng American blogger na si Sarah Pope, na sinasabing may-akda ng bahagi ng kanyang “turno en contra” speech noong August 13, 2012.

Sa halip ay ipinatanggal niya ang bahaging iyon ng kanyang speech mula sa Senate Journal, ngunit nanindigan ang senador na ito ay mula sa pag-aaral ni Dr. Natasha Campbell-McBride.



BILL ABOUT BLOGGING. Sa ulat na lumabas sa Rappler ngayong hapon, sa isang punto raw ng sesyon kanina ay tumayo raw si Senate President Juan Ponce Enrile upang ipaliwanag ang nauna nitong pagtatanggol kay Senator Sotto.

Ani Senator Enrile, gusto lamang niyang idiin na ang mahalaga ay kung ang mga argumento ni Senator Sotto laban sa RH Bill ay totoo o hindi.

Inamin din ni Senator Enrile na hindi siya Internet-literate, kaya ang aral daw sa karanasang ito ay magsampa ng panukalang batas upang maitakda ang karapatan ng mga nagba-blog.

Saad niya, “’Di ako nagi-Internet kaya nung lumabas yung suplong o question tungkol sa Majority Floor Leader, tinanong ko, ‘Ano ba iyong blog’ dahil wala akong blog.

“Di ko alam ang blog. Akala ko parang slogan ang blog.

“Iyon pala, parang libro yata daw iyon sa Internet na nilalagay mo doon ang iyong mga panaginip, mga opinyon, mga ideya, mga kaalaman.

“Magpanukala tayo ng batas at ilagay natin doon kung ano ang mga karapatan ng mga may blogs para sa ganoon ay maliwanag.”

Sinang-ayunan naman ito ni Senator Sotto.



SENATOR SOTTO’S PRIVILEGE SPEECH. Narito ang kabuuan ng privilege speech ni Senator Tito Sotto sa Senado kaninang hapon, August 29, 2012:

Mr President:


Nito pong nakaraang linggo, bigla pong nalayo ang usapan sa Reproductive Health Bill, at nadala sa plagiarism o pang-aangkin. Naniniwala po ako na ito ay bahagi lamang ng isang hatchet o demolition job laban sa akin upang humina ang aking paninindigan laban sa RH bill.

ADVERTISEMENT - CONTINUE READING BELOW


Marahil, kaya ganito ang nangyari, ay hindi po napakinggan ng lubos ang aking talumpati, at ang mga kalaban ay naghanap ng maliit na isyung makakapuwing sa akin. Marahil ay di nila natandaan ang aking sinabi na aking ad-lib o extemporaneous portion ng aking talumpati, ng sinabi ko ang ganitong mga kataga:


"Hindi po ako nagdudunung-dunungan dito. Hindi ko po iniimbento ito. Itong mga kino-quote ko po dito ay mga fact na pinatotohanan ng mga eksperto sa larangan ng agham at batas."


Wala po akong inangkin sapagka’t ako po ay di doktor. Ang blanket disclaimer ay pag-amin na ang research materials na nilalaman ng aking talumpati ay batay sa mga pag-aaral ng mga iginagalang na eksperto.


Ako yata ang kauna-unahang senador ng Pilipinas na naging biktima ng cyber-bullying. Mula sa blogs, Facebook, at Twitter, ginawa akong sentro ng mga mapanira at malisyosong atake ng iba’t ibang tao, lalo pa ng mga sumusuporta sa RH Bill. Bahagi siguro ito ng kanilang istratehiya, lalo pa’t may milyun-milyon silang pondo. "If you can’t kill the message, kill the messenger". Mukhang ganito ang ginagawa ng aking mga detractors.


Nakakapagtaka lang po na walang mga sagot akong nadinig sa aking mga punang ibinato laban sa RH Bill, tulad ng mga sumusunod: Na ang RH Bill ay labag sa ating saligang batas na nagtatakda ng proteksyon sa mga batang di pa naipapanganak magmula sa pagkabuo o conception; Na ang RH Bill ay makasasama sa kalusugan ng mga babaeng buntis at sa mga magiging anak nila; Na ang RH Bill ay di na kailangan sapagka’t ginagawa na ito ng Department of Health; Na ang RH Bill ay malaking gastos para sa bayan sa halip na magamit ito sa mga paaralan, ospital at mga gamot; Na ang RH Bill ay di naaayon sa ating kultura.

ADVERTISEMENT - CONTINUE READING BELOW


Mula rito napunta na sa plagiarism.


Ayon sa ika-siyam na edisyon ng Black’s Law Dictionary na inedit ni Bryan Garner, ang plagiarism ay ang "deliberate and knowing presentation of another person’s original ideas or creative expressions as one’s own."


Sa Merriam-Webster Dictionary naman po, ang kahulugan ng plagiarism ay "to steal and pass off the ideas or words of author as one’s own".


Samantalang sa Oxford Dictionaries naman ay ito ang kahulugan ng plagiarism: "the practice of taking someone else’s work or ideas and passing them off as one’s own."


Nais ko ring banggitin para sa kaalaman ng mga tagapakinig, lalo na ng mga taga-pintas kong nais akong makasuhan dahil sa pangyayaring ito, na walang krimen ng plagiarism sa Pilipinas. Kahit hanapin ninyo pa sa Revised Penal Code, sa Intellectual Property Code, at maging sa Special Penal Laws, wala kayong makikitang krimen ng plagiarism. Pinakamalapit na sa maaaring pag-isipan ay copyright infringement, na hindi naman tatayo ayon sa mga abogado dahil walang paglabag sa alinman sa mga copyright o economic rights na nakasaad sa Section 177 ng Intellectual Property Code.


Maging si Atty. Louie Andrew C. Calvario from the Office of the Director General of the Intellectual Property Office ay nagpahayag na: "The crime of plagiarism is not defined in our laws, particularly the Intellectual Property Code and the Revised Penal Code. Neither can it be characterized as copyright infringement since it did not economically injure the author". Sinabi niya din na "in his opinion the act was not copyright infringement since the defense of statutory fair use (Sec. 184.1 IP Code) and fair use (Sec. 185, IP Code) can be invoked".


Para sa mga naninira at humuhusga sa akin sa facebook, twitter, blog at pati na rin sa diyaryo ito po ang masasabi ko. Kahit mukha akong walang pinag-aralan kung ikukumpara sa mga pinag-aral nila at hindi kasing dunong nila, ang mahalaga ay ang ipinaglalaban ko. Malinis po ang hangarin ko na ipaglaban ang sanktidad ng buhay. Naniniwala po ako na kahit kailanman, wala kahit isa sa atin ang may karapatan na ipagkait itong mundong ating ginagalawan. Ito po ay hindi sa atin.

ADVERTISEMENT - CONTINUE READING BELOW


Ang aming programa sa telebisyon, yung pong Eat Bulaga kung saan kasama ko po ang aking kapatid na si Vic at si Joey. Pati ang partisipasyon ko ay pinipintasan nila. Tinatawag pa akong payaso. Mr. President, mas gusto ko ng maging payaso at pasayahin ang mga tao kesa sa kanila na nagsasabi ng masama laban sa kapwa. Kami po sa Eat bulaga ay daan-daang tao ang natutulungan, libu-libo at milyun-milyon ang nasisiyahan at tumatangkilik, samantalang itong mga tumutuligsa at namimintas sa akin, ilan kaya ang kanilang natutulungan? Kung meron man?


Ok sa aking yung marunong na tao, pero ang nakakatakot yung ang akala marunong siya, yun pala marunong lamang manira ng kapwa. Ano pa nga bang magagawa natin, kung hindi ipagdasal na lamang sila. Ang mahalaga ay kung ilan ang ating natulungan at hindi ang ating nasiraan.


Bilang pangwakas, nais kong basahin ang last two paragraphs ng tula tungkol sa issue ng Pagkopya na ginawa ni Joey De Leon, na isang mahusay na makata na ilalabas sa Philippine Star.


Eh ’di wala nang titingin sa katalogo,
Ipagbawal mga sumusunod sa uso,
Mga impressionists ipakulong na ninyo,
Pati na rin si Willie Nepomuceno.


Ang masama lamang pagdating sa gayahan
Ay yaong masasamang asal ang tularan
At kopyahin ang pera at lagda ninuman
At gayahin ang pilay at may kapansanan.


Sana po basahin din ninyo ang Psalm 56, 63, 64


And one last thing, Mr. President. Ganito man kasakit ang ating palitan ng katwiran, tayo’y isang bayang naghahanap ng liwanag at katotohanan. Sana, maisip nating magpasalamat sa ating pinang-galingan -- ang tunay na Awtor ng aklat ng ating buhay at bawa’t kaluluwa ng isang sanggol na nabuo na sa sinapupunan ng kanyang ina. Sana, lahat ng nag-dadalang-tao ay magsilang ng tao.


This ends my privilege speech. Mr. President, with the permission of this body, I move that the paragraph containing reference with the study of Dr. Natasha Campbell-McBride which can be found in Journal No. 8 page 162 dated August 13, 2012 be stricken off the record in order to lay this matter to rest.

ADVERTISEMENT - CONTINUE READING BELOW


WE RECOMMEND


FROM THE SUMMIT MEDIA NETWORK


SPONSORED CONTENT


COMMENTS

Loading comments

THIS JUST IN