Nagpasa kamakailan ng disqualification case at election complaint sa Commission on Elections (Comelec) laban kay Ilocos Sur representative Ronald Singson ang kanyang katunggali sa pagkakongresista sa darating na eleksiyon.
Nagsumite ang abogadong si Bertrand Baterina—tumatakbong congressman sa first district ng Ilocos Sur— ng reklamo sa Comelec laban kay Singson dahil umano sa pagkakasentensiya nito sa kasong drug trafficking sa Hong Kong dalawang taon na ang nakalilipas.
Sa kanyang petisyon, sinabi ni Baterina na hindi kwalipikado si Singson na tumakbo bilang kongresista dahil na rin sa nakasaad sa Section 12 of the Omnibus Election Code matapos umanong masentensiyahan si Singson ng krimeng “involving moral turpitude,” ayon sa ulat ng gmanetwork.com.
“Clearly, Singson was sentenced by final judgment for an act contrary to justice, modesty, or good morals, with much weight considering that at the time of his arrest and subsequent conviction, he was incumbent representative of the first district of Ilocos Sur,” pahayag ni Baterina sa kanyang petition for disqualification with motion to suspend proclamation laban kay Singson.
Idinagdag ng GMA News Online na sinikap nitong kunin ang pahayag ni Singson sa isyu nang ilabas nila ang balita noong Abril 24, Miyerkules.
Tumatakbo sa ilalim ng Nacionalista Party at partidong local na Bileg si Singson, 43, habang si Baterina naman, 43, ay kabilang sa Liberal Party ng administrasyong Aquino.
Ang anak ni dating Ilocos Sur governor Luis “Chavit” Singson, ay nasentensiyahan ng isa at kalahating taong pagkakakulong noong February 2011 dahil sa kason drug trafficking sa Hong Kong. (CLICK HERE to read related article.)
Inaresto siya sa Chek Lap Kong International Airport noong Hulyo 2010 matapos madiskubre ng mga awtoridad ng 6.67 gramo ng cocaine na kanyang pagmamay-ari.
Bukod pa sa inihaing disqualification case, nagsumite rin ng reklamo si Baterina laban kay Singson ng paglabag sa Comelec Resolution 9561 dahil umano sa “availing the services of policemen without prior consent or authority of Comelec.”
Kuwento ni Baterina, habang siya at ang kanyang pangkat ay nagbibiyahe sa national highway ng Bantay, Ilocos Sur ay pinahinto sila ng dalawang naka-unipormeng pulis na nakamotorsiklo na nag-e-escort sa convoy ni Singson. Idinagdag din ni Beterina na sakay ng mobile vehicle ng Vigan police ang armadong SWAT team.
Ayon sa report ng GMA News Online, tumangging magbigay ng komento si Poll chairman Sixto Brillantes Jr. hinggil sa kaso subalit sinabing pag-aaralan niya ang diumano’y paglabag sa paggamit ng serbisyo ng pulis para sa convoy ni Singson.