Inusisa ng PEP.ph (Philippine Entertainment Portal) si Vice Ganda tungkol sa issue ng gay rights advocacy na pinag-uusapan ngayon.
Pinagtibay ito ng litrato ng magpinsang Isabelle Daza at Georgina Wilson kung saan nagpost ang una sa kanyang Instagram ng isang black-and-white photo kunsaan magkadikit ang kanilang mga labi.
Ayon kay Vice sa set ng Juan dela Cruz ng ABS-CBN kung saan siya ang guest celebrity sa mga susunod na episodes bilang si Santana, “Totoong halikan? Wala naman sigurong masama lalo na't magpinsan naman sila.
“E, mga bakla [sina Isabelle at Georgina] naman kasi yun. E, kung ilalabas mo sa konteksto, saka lang mabibigyan ng malisya.
“Kaya, dapat mag-focus tayo sa kung ano ang konteksto o mensahe ng larawan para hindi na tayo lumabas.”
Kagagaling lang ni Vice sa Hawaii para sa show ng It's Showtime. Kinumusta namin ang karanasan nila sa pang-aaliw nila sa ating mga kababayan sa abroad.
Ang It's Showtime ay ang noontime variety show ng ABS-CBN na siyang pangtapat nila sa Eat Bulaga! ng GMA-7.
Bulalas ng It's Showtime host, “Masaya! Para kaming naglaro na may bayad... ganun.
“Bongga ang pagtanggap sa amin kasi pangalawang tour pa lang naman yun ng Showtime sa ibang bansa. Masaya, sobrang saya!
“First time ko lang sa Hawaii, actually. Ang dami namin [sa production people] na first timers kaya na-excite kami sa pagpunta do'n.”
HAWAII EXPERIENCE. Kinulit namin siya tungkol sa boys ng nasabing bansa. Marami bang “papables?”
Natatawang sabi ng komedyante, “Marami kaya lang nganga ako. Hindi ako nagpa-girl kaya lang hindi ko alam ang 'mercado.' Hindi ko alam ang kalaran do'n.
“Kaya minsan kapag lumalabas kami like nung nag-clubbing kami, ang daming guwapo. Niloloko nga nila ako. Sabi nila, 'Tsumika ka na.'
“Ako naman, 'Naku, hindi nga ako makatsika dito, mamaya mabugbgog pa ako.'
Wala bang nagbigay sa kanya ng tips kung ano ang kalaran sa tropical country?
“Wala,” kaswal na sagot niya. “Kasi kung lumalabas kami... sabi ko nga, 'may manonood ba sa atin, e, wala akong nakakasalubong na Pinoy?'
“Tapos tuwing gumigimik kami o pumunta sa mall, ano... kasi, ang mga Pinoy pala ay nagtatrabaho.
Kaya, bihira ko silang makita sa kalsada... kahit sa clubs, wala."
Ano naman ang reaksiyon ng mga Pinoy nang eventually ay makita na sila ng mga ito?
Pagbibiro niya, “Nagagandahan sila sa akin. Nasanay naman ako sa gano'ng reaksiyon. Charot!
“Wala, wala talaga. Nganga!
“Pero, siyempre, umasa ako. Pero, hindi naman kasi ako mahilig sa foreigners.”
ON COCO MARTIN. Tungkol naman sa kanyang best friend na si Coco Martin na lead actor ng Juan dela Cruz ang aming napag-usapan.
Inalam namin sa kanya kung nagkukuwento si Coco sa kanya tungkol sa lovelife nito.
“Ikinukubli niya,” nangingising tugon ng 37-year-old comedian.
“Wala talagang siyang hilig magkuwento.
“At saka, alam niyang close ako kay Kris Aquino.
“Sasabihin niya, 'Pag nagkuwento ako, itsitsika mo na naman kay Kris. Lalaki na naman 'yan. Kakalat na naman 'yan.'
COCO'S PAST GIRLFRIENDS. Pero may idea ba siya kung sinu-sino ang mga naging karelasyon ni Coco?
Aniya, “Dati, pero ngayon, hindi na. At saka, aligaga ako sa trabaho, paano pa ako... wala.
“Hindi talaga siya aamin.”
Naalala namin ang sinabi niyang crush niya si Ryan, ang nakababatang kapatid ni Coco. Nakikita pa ba niya ito?
“Oo, laging kasa-kasama niya ngayon [ni Coco],” nangingiting sabi ni Vice.
“Pero, ano... kasi noon, ang bata pa n'ya [Ryan]. Sixteen-years-old pa lang siya or seventeen nang magtrabaho siya sa Punchline.
“Tapos, close ko yung pinsan niya, ayaw.
“Di pumapayag. Parang baby-baby lang.
“Pero alam na ni Coco na pumu-project ako do'n sa kapatid niya. Wala naman siyang sinabing kontra pero no'ng huli na sinabi niya na, 'Ganun, pinu-prodyekan [projected] mo si Ryan?'
“Hindi siya boto. Wala namang boto 'yan [si Coco]. Ewan ko diyan, gusto ata niyan ay mambabae ako.”
Sa mga naging girlfriends naman ni Coco, boto rin ba siya?
Sabi ng box-office star, “Ilan lang ang nalaman ko, e. Hindi ako pabor masyado. Yung iba dinadala niya no'n sa comedy bar.
“Nung bagets na bagets pa siya, may nadadala siya.”
Yung kay Julia Montes, naniwala ba siya? Na-link ang dalawa ng magkasama sa teleseryeng Walang Hanggan.
Pahayag ng TV host, "Hindi ko alam kung naging sila. Pero, parang hindi naman. Pero, may something.
“Pero, si Coco parang bet si Julia pero bagets pa nga yung isa.
“Parang dyinowa [gawing girlfriend], mababangbang naman siya kasi nga bagets na si Julia. Pero, parang bet din naman niya si Julia.
“Pero parang bet nila ang isa't isa pero hindi mag-dyowa. Kasi naman, mag-love team kayo araw-araw, pa-sweetan kayo ng pa-sweetan, imposible namang wala.
“E, maganda naman yung Julia.”
Tungkol naman kay Maja Salvador?
“Ay, ayaw kong mag-comment do'n,” natatawang saad niya. “Pero, no'ng nagbugbugan sila ni Mateo [Guidicelli], ako ang unang kausap niya sa telepono.
“Tinanong ko siya kung ano ang nangyari, yun lang.”
BEST FRIENDS. Talaga palang ganoong kalalim ang kanilang pagkakaibigan.
Ayon sa kanya, “Kaya mahal ko ang taong 'yan kasi , di ba, kahit lalaki si Coco, naniniwala akong mahal na mahal ako niya ako.
“Naramdaman ko, ini-verbalize n'ya, ipinararamdam niya talaga, ginagawa niya talaga. Hindi siya yung pangkaraniwang naging kaibigan ko.
“At saka dati, nung nagtrabaho 'yan sa abroad, dun talaga kami naging best friend, nagkausap kami sa Friendster. Nagme-message kami sa Friendster.
“Tapos sa Yahoo Messaging, kaya alam ko talaga ang lahat na pinagdaanan niya doon. Tapos, pinadadalhan niya ako... lagi siyang may pasalubong sa akin.
“Hindi naman lahat ng lalaki ay magbibigay ng gano'n sa bakla unless mahal niya talaga ang kaibigan niyang bakla.”
TOGETHER THRU LIFE'S UPS AND DOWNS. Sa tingin niya bakit siya mahal ni Coco?
Mabilis niyang sagot, “Kasi sincere ako do'n, e. Ang dami naming pagkakapareho sa buhay... mga pinagdaanan namin sa buhay.
“May isang beses nga wala siyang raket nung galing siyang abroad kasi nahinto ang pag-i-indie niya, e.
“E, kalakasan ko no'n. Naghu-host ako ng events, nagdya-judge ng mga events
“May isang beses na nag-judge ako ng isang Mr. and Ms. sa isang eskuwelahan, sabi ko sa organizer, kunin niyo rin yung kaibigan ko, si Coco Martin.
"E, hindi pa noon kilala si Coco. Tapos sabi sa akin ng organizer, maliit lang ang budget.
“Sabi ko, 'okay lang yun.' Yung budget ko, ibinigay ko sa kanya [kay Coco].”
Dagdag pa ni Vice, “Tapos no'n, kumain kami sa Timog, do'n kami nagkuwentuhan ng marami. Iyakan kami kasi ang dami talaga naming problemang hinarap na pareho kami.
“Ang dami naming sitwasyon na hinarap na pareho kami.”
Ngayon ay pareho na silang successful. Napapag-usapan pa ba nila ito?
“Oo,” pag-amin niya. “Ang nakakatuwa kasi pareho kaming naghirap. Pareho kami ngumanga, pareho kaming nagutom.
“Tapos pareho kaming biniyayaan ng sabay... sabay na sabay. Sabay kaming nag-hope, sabay naghintay.
“Ang suwerte talaga naming pareho kaya mas lalo naming naintindihan ang isa't isa. Alam namin kung saan kami nanggaling.
“At pareho kaming ugali. Pareho kami laban kung laban. Gano'n kami,” pagtatapos ni Vice.