Sa kabila ng mga bumabatikos sa sunud-sunod na panawagan ni Sharon Cuneta na tumulong sa mga nasalanta ng super typhoon Yolanda, hindi naman humihinto ang Megastar sa pagkakawanggawa.
Bilang tulong, nangako ang Madam Chairman actress na magbibigay siya ng P10 million para sa mga biktima ng bagyo, na may international name na Haiyan.
Sa kanyang Twitter account, sinabi ni Sharon na ipapaabot niya ang tulong sa pamamagitan ng Aboitiz Foundation ng Aboitiz Group at Alagang Kapatid Foundation ng TV5.
Ang Aboitiz Group ang nagmamay-ari ng SuperFerry, ang transportasyong pandagat na dating inendorso ni Sharon.
Ang TV5 naman ang kasalukuyang home network ng kinikilalang Megastar ng local showbiz.
KRIS & LUCY. Bukod kay Sharon, agad ding nagbigay ng tulong si Kris Aquino sa kanyang malapit na kaibigang si Lucy Torres-Gomez, matapos humingi ang huli ng tulong sa pamamagitan ng Instagram (lucytgomez).
Si Lucy ay kasalukuyang representative ng fourth district ng Leyte, na kabilang sa mga lugar na matinding napinsala ng super typhoon Yolanda.
Ayon sa post ni Lucy, nagpadala ng tseke ang nakababatang kapatid ni President Noynoy Aquino na nagkakahalaga ng P400,000.
Sa caption ng Instagram post, isinulat ni Lucy: “Numerous pledges have poured in and first physical check donation is here. Thank you @krisaquino214!🌺🌺🌺 may your generosity be rewarded a millionfold.
“Btw, a website is being set up at this very moment for purposes of accountability and transparency.
“All donations, in cash and kind, will be posted in the website, and all recipients as well.
“Will announce web address as soon as it is up and running. God bless the Philippines🌺🌺🌺 #rebuildOrmocandLeyteIV”
FUNDRAISING ACTIVITIES. Bukod kina Sharon at Kris, ilang celebrities na rin ang nagbigay tulong sa mga biktima ng super typhoon Yolanda.
Isa na rito ang It’s Showtime host na si Anne Curtis, na nagsagawa ng garage sale sa Taguig City kahapon, November 10.
Sa pamamagitan ng pagbebenta ng mga gamit na damit at sapatos, nakalikom si Anne ng P370,000 na diretsong mapupunta sa World Vision, na siyang magbibigay ng pagkain, tubig, gamot, at iba pang bagay na kailangan ng mga biktima.
Samantala, narito ang ilan pang celebrities na nagbabalak magbenta ng kanilang mga gamit para makatulong sa mga biktima ng super typhoon Yolanda.
Regine Velasquez-Alcasid
Julia Barretto
Aiko Melendez
Miriam Quiambao
Rhian Ramos