Kahit raw palabiro si John 'Sweet" Lapus sa totoong buhay, at maging si Vhong Navarro ay ganoon din, sa panahong may pinagdaanan ang kanyang kaibigan ay hindi niya ito nagawang biruin.
Pero sa presscon ng Da Possessed noong Linggo, March 30, sa Dolphy Theater ng ABS-CBN, nagawang biruin ni Sweet si Vhong na ikinangiti ng huli.
Pahayag ni Sweet, "Kailangang titimplahin mo pa si Vhong.
"Kanina lang happy ang mood nating lahat, napa-punchline ko siya tungkol sa 'foods.'
"Napa-punchline ko siya na nakatulong ba yung takot niya sa tunay na buhay sa role niya rito.
"Napa-punchline ko siya na perfect yung timing, perfect yung moment.
"Sa shooting kasi, medyo seryoso ka pagdating sa trabaho.
"Ang maganda, kahit hindi namin pinag-uusapan o pina-punchline yung nangyari, kitang-kita naman na ginawa niya yung trabaho niya.
"Ibinigay niya kung ano ang dapat na gawin niya sa pelikulang ito."
MR. SUAVE. Habang ginagawa nila ang pelikula, may napansin ba siyang pagbabago sa mga kilos ni Vhong? Naapektuhan ba ang pagiging masayahin nito ng mga pangyayari?
Sagot ni Sweet, "Well, sa first few days namin, parang ganun.
"Noong bumalik siya after nang maospital, nakita ko naman at inamin naman niya na nawalan siya ng kumpiyansa.
"Tahimik lang siya, nagkukulong siya sa dressing room.
"'Tapos nung nagkaroon na siya ng leading lady [Solenn] at siguro very funny na ang mga eksena, aba, ayun, bumabalik na ang dating Vhong Navarro.
"Mr. Suave na ulit at tsumitsika na ulit sa amin at sa lahat.
"Nakakapag-suggest na siya kay Direk Joyce [Bernal] tungkol sa punchlines na gusto niya.
"So, lahat kami ay natuwa para sa kanya."
THANKFUL. Isa si Sweet sa unang nagpahayag tungkol sa hindi niya pagbitaw bilang kaibigan ni Vhong sa gitna ng mga akusasyong rape laban dito.
Lahad ng comedian, "Sa Twitter niya nabasa, nagpu-post talaga ako ng words of support habang nangyayari ang mga yun.
"Nagpa-thank you siya sa Twitter.
"At sa araw na magkaeksena kami ay niyakap at nagpa-thank you siya sa akin.
"Yun na yun, wala na siyang iba pang dapat sabihin kundi 'maraming salamat, Sweet.'
"Actually, hindi naman niya kailangang magpasalamat, pero naa-appreciate ko na naa-appreciate niya na sinusuportahan ko siya sa laban niyang ito."
Dugtong pa ni Sweet, "Magkaibigan naman kami ni Vhong.
"Inaanak ko si Yce, na alam niyo naman na ang dating asawa ni Vhong ay si Biance Lapus na pinsang buo ko.
"So, meron kaming konek ni Vhong."
Si Yce Navarro ay ang anak na lalaki ni Vhong kay Bianca Lapus bago sila nagkahiwalay at na-annul ang kanilang kasal noong 2008.
HIS YEAR. Samantala, sa parte naman niya, naniniwala si Sweet na taon niya ang 2014 kung career ang pag-uusapan.
Sunud-sunod ang kanyang proyekto sa pelikula man o TV
Dahil daw sa Year of the Ox ipinanganak si Sweet, buong-ningning niyang pagmamalaki, "Well, sinasabi sa akin ng mga feng shui at mga manghuhula, care of Kris Aquino, na this is daw my year.
"Hindi ako basta naniniwala sa mga ganyan, pero kung babasehan ang mga pangyayari, parang totoo nga yata.
"Sabi ko nga, 'Aba, sabay-sabay pala ang mga ginagawa ko!'
"Pero sana sa susunod, sana ay sunud-sunod naman para 'di naman ako mangarag, 'di ba?
"Ang maganda nito, dahil nangangarag ako ay pumapayat ako.
"Maganda rin na I always come prepared sa set at iba-iba ang mga karakter ko sa mga ginagawa ko."
Pagkatapos ay iniisa-isa niya ang mga papel na kanyang ginagampanan sa magkakasunod niyang proyekto.
Sabi niya, "Ako si Paeng sa Mirabella, tatay ni Julia Barretto.
"Yung sa Wansapanataym naman na napapanood tuwing Saturday ay 'tiyahin' naman siya na hindi naniniwala sa duwende.
"At dito sa Da Possessed, isa naman akong multong bakla na mapaghiganti.
"So, pare-parehong bakla ang role, pero iba-ibang karakter, iba-iba ang personality at iba-iba ang look nila.
"Minsan nalilito ako, pero 'pag na-makeup-an na ako, alam ko na kung sino ako."