Naiyak sa sobrang tuwa si Vhong Navarro, 37, matapos ibasura ng Department of Justice (DOJ) ang reklamong panggagahasang inihain laban sa kanya ni Deniece Cornejo, 22.
Napanood ni Vhong ang breaking news tungkol dito sa mismong studio ng It’s Showtime, ang noontime show ng ABS-CBN, kasama ang kanyang co-hosts, bago nagtapos ang kanilang programa Huwebes ng hapon, April 10.
Pagkatapos nito ay pinasalamatan ng actor-TV host ang kanyang pamilya at mga taong tumulong na ilaban ang kaso niya.
Kabilang dito ang kanyang manager na si Chito Roño, ang legal counsel niyang si Atty. Alma Mallonga, si Tony Calvento, at lahat ng mga kasamahan niya sa ABS-CBN.
Special mention din ang girlfriend ni Vhong na si Tanya Winona Bautista, na nanatili raw sa kanyang tabi at nagbigay sa kanya ng “second chance” sa kabila ng kasalanan niya rito bilang karelasyon.
Lakas-loob daw ipagpapatuloy ni Vhong ang pagtaguyod sa mga kasong isinampa niya laban sa grupo nina Cedric Lee at Deniece Cornejo upang patunayan na hindi niya magagawang manamantala ng babae.
Saad ni Vhong, “Sabi ko nga po, e, siguro hindi ako naging mabuti masyadong ama. Hindi ko nabigay lahat sa mga anak ko.
“Siguro nagkasala ako sa girlfriend ko. Opo, inaamin ko po lahat ‘yan.
“Pero ipinapangako ko po, naging mabuti po akong anak.
"At yung pagiging mabuti kong anak, gusto ko ipakita sa mga anak ko yun.
“Kung paano ko nagawa yun, paano ko nalampasan yun, dahil ayokong mabahiran ng krimen ang aking pagkatao.”
BASIS OF SERIOUS ILLEGAL DETENTION. Hiningan ng PEP.ph (Philippine Entertainment Portal) ng pahayag si Atty. Mallonga hinggil sa desisyon ng DOJ sa kaso ni Vhong.
Bagamat hindi pa nababasa ni Atty. Mallonga ang 42-page resolution ng DOJ, ipinaliwanag niya ang posisyon ng kampo ni Vhong hinggil sa krimeng ginawa diumano ng grupo nina Cedric laban sa aktor.
“Ang sinabi natin dito, the elements of illegal detention were present. I would surmise that the DOJ agreed,” panimula ng abugada.
Ayon kay Atty. Mallonga, ang pangunahing elemento ng illegal detention ay ang kawalan ng basehan upang tanggalan ng karapatan ang isang mamamayan na malayang makakilos.
Hindi raw mahalaga kung gaano katagal ang naganap na illegal detention, basta mapatunayang nagtamo ang biktima ng “serious physical injuries” at “threats to life.”
Saad niya, “Clearly, the detention was illegal because remember Cedric provided the explanation themselves.
“They said that they effected a ‘lawful arrest,’ that they held Vhong because he has committed a crime [of rape].
“If we know that this is not true, there could be no legal basis to detain Vhong.
“Detention is deprivation of liberty.
“As in his case, itinali si Vhong, they prevented him from moving, they coerced him to go to Taguig, they injured him, and more importantly, in my mind, they threatened to kill him.”
Pormal na sinampahan ng kaso sina Cedric Lee, Deniece Cornejo, Berniece Lee, Simeon “Zimmer” Raz Jr., Jed “Mike” Fernandez, Jose Paolo “JP” Calma, at Ferdinand Guerrero sa Taguig Regional Trial Court ngayong araw, April 10.
Patuloy na paliwanag ni Atty. Mallonga, inaasahang magsagawa ang korte ng “judicial determination of probable cause” o “independent finding” sa loob ng sampung araw.
“The judge cannot adapt the reasoning of the DOJ. It must make it's own assessment.
“If the judge believes there is sufficient evidence reaching probable cause that Cedric Lee and others committed serious illegal detention, the court will issue warrant of arrest.”
Ang illegal detention ay isang non-bailable offense, alinsunod sa Section 248 ng Revised Penal Code of the Philippines.
Ayon sa chanrobles.com—kung saan nakalathala ang Revised Penal Code of The Philippines—na ang mapapatunayang nagkasala ng serious illegal detention ay maaaring maparusahan ng “reclusion temporal in its maximum period to death.”
Kung mapapatunayan namang may kasamang extortion ay may kaparusahang "reclusion perpetua to death."
FURIOUS DENIECE. Samantala, umalma si Deniece Cornejo sa pagbasura ng DOJ sa reklamong panggagahasa na inihain niya laban kay Vhong.
Pahayag ni Deniece, sa live phone patch ng 24 Oras at inilathala ng GMA News Online ngayong gabi, April 10: “Ako na na-rape, ako na naperhuwisyo, ako na nagpalampas, 'tapos ako pa ang kakasuhan.
“Napaka-unfair naman 'yan sa part ko, at sa part ng pamilya ko."
Tahasan ding inihayag ni Deniece na hindi patas ang isinagawang imbestigasyon ng DOJ hinggil sa kanyang reklamo.
“Halatang-halatang may pinapanigan. Dinudurog yung pagkatao namin.
“At saka yung paninindigan namin, masyado ano po yun... ayun talaga.
"Nakakadismaya, nakakalungkot, nakakanginig, at nakakagalit,” dagdag pa ng 22-year-old model.
Tumanggi namang magbigay ng opisyal na pahayag ang legal counsel nina Cedric at Deniece na si Atty. Howard Calleja.
Ito ay sa kadahilanang hindi pa raw siya nakatatanggap ng kopya ng joint resolution ng DOJ hinggil sa hiwalay na reklamo nina Vhong at Deniece.
Ayon naman kay Atty. Mallonga, isa sa posibleng rason ng DOJ sa pagbasura sa rape complaint ni Deniece laban kay Vhong ay ang kawalan ng basehan sa isinagawang "citizen arrest" ng grupo ni Cedric sa actor-TV host.
Matatandaang ipina-blotter nina Cedric at Deniece si Vhong sa Southern Police District matapos diumanong halayin ng actor-TV host ang dalaga.
Sabi ni Atty. Mallonga sa PEP, "That's the core of their defense.
"They say that Vhong was hurt, they brought him to the police, they effected a lawful citizen's arrest. That's what they're saying.
"Ang sinasabi nila, nagkaroon ng rape.
"Now, hindi ka puwede maniwala na mayroong rape, kung maniniwala ka kay Vhong.
"And the evidence really speaks for itself."
Sa huli, nagpasalamat si Atty. Mallonga kay Tony Calvento dahil sa insights at kontribusyon nito bilang journalist, lalo na sa pagpapalaganap ng impormasyon sa publiko hinggil sa kaso ni Vhong.