Naririto pa sa Pilipinas ang businessman na si Ferdinand Guerrero, isa sa mga akusado sa pambubugbog kay Vhong Navarro noong January 22, 2014, sa Forbeswood Heights Condominium, sa The Fort, Taguig City.
Sa text message niya kahapon, April 13, sa Startalk ng GMA, sinabi ni Guerrero na, “I’m out of here. Time to explore new places in Asia.”
Dahil sa kanyang mensahe, inakala na nakaalis na ng bansa si Guerrero.
Pero nakumpirma ang balita na naririto pa siya sa Pilipinas at hindi natuloy ang biyahe niya ngayong umaga, April 14, sa Hong Kong dahil sinita siya sa Ninoy Aquino International Airport ng Immigration official habang nakapila sa Immigration counter, bandang 4:40 ng madaling-araw.
Hindi na itinuloy ni Guerrero ang tangkang pag-alis dahil sa lookout bulletin na inilabas ng Bureau of Immigration para sa kanya at sa ibang mga akusado sa pananakit kay Navarro.
Noong nakaraang linggo, isinampa ng Department of Justice ang mga kaso ng serious illegal detention at grave coercion laban kina Cedric Lee, Deniece Cornejo, Ferdinand Guerrero, at sa apat nilang kasama na sangkot din sa non-bailable offense.