Usap-usapan ngayon sa Internet ang intimate photos sa Instagram account ng aktor na si Jake Cuenca.
Nitong mga nakaraang araw, sunud-sunod ang pag-post ni Jake ng mga larawan kasama ang Filipino-Australian model na Chanel Olive Thomas.
Walang anumang paglalarawan na inilagay si Jake sa mga ito, subalit marami sa kanyang followers ang nagsasabing ang naturang model ay ang bagong karelasyon ng Ikaw Lamang actor.
April 11, Biyernes, nang i-post ni Jake ang larawan sa baba at may caption na: “This girl! :) @chanelolivethomas”
Halos kaparehong larawan naman ang nai-post ng Manila-based Fil-Australian model sa parehong araw. May caption lamang itong: “Us. 🙈”
Nang sumunod na araw, April 12, Sabado, nag-post naman si Chanel ng larawan nila ni Jake na magkahalikan. May caption itong: “#hemakesmehappy”
Ang mga ito ay sinundan pa ng ilang posts na magkasama ang dalawang sinasabing magkasintahan na ngayon.
Sa ngayon, wala pang opisyal na pahayag si Jake tungkol sa mga larawan nilang ito ni Chanel.
Sa panayam sa aktor sa Aquino & Abunda Tonight noong March 18 episode, inamin niyang “[I’m] dating around.”
Pero hindi naman daw exclusively dating.
Ang huling napabalitang niligawan ni Jake ay ang dati niyang co-star sa Maria Mercedes na si Jessy Mendiola.