Apat na taon na raw na si Sunshine Garcia mismo ang namamahala sa kanyang showbiz career simula nang matapos ang kontrata niya sa talent manager na si Joy Cancio.
Natatawang sabi ng dating miyembro ng SexBomb Dancers, “Me, myself and I, diretso na sa akin.”
Nilinaw naman ni Sunshine na hindi siya tuluyang nawala sa poder ni Joy.
Saad niya, “Sa kanya pa rin ako, wala nga lang kaming kontrata.
"Once na may show ako, ibinibigay ko pa rin ang commission niya maski wala na kaming kontrata."
Labintatlong taon daw siyang hinawakan ni Joy bilang talent at bahagi ng SexBomb.
Hindi ba mas mahirap na siya mismo ang nagma-manage sa sarili niya?
Sagot ng dancer turned actress, “Hindi, kasi parang natuto rin ako na ibenta ang sarili ko.
"Kapag kunwari may kumuha sa akin, sasabihin ko, 'O, sa susunod baka naman may show ka riyan.'
"Sila na rin ang lumalapit.
"At least, solo mo. Iintindihin ko na lang ang BIR [Bureau of Internal Revenue]."
Nakausap ng PEP.ph (Philippine Entertainment Portal) si Sunshine sa taping ng Banana Split sa Music Museum.
SPECULATIONS. Samantala, hindi nawawala ang mga haka-haka tungkol sa pagkawala ni Joy Cancio sa sirkulasyon.
Wala raw masasabi si Sunshine tungkol dito dahil simula nang mabalitang naospital ang dati niyang manager ay hindi na sila nakapag-usap.
Ni hindi na raw niya ito nakakapalitan man lang ng text message.
Sabi niya, “Yung huling usap pa namin sa kanya, December, nag-send nga siya ng schedule.
"Kinabukasan, naospital na siya. After nun, wala na.”
May mga lumabas na balitang kesyo dumaan daw si Joy sa depression. Meron pang nabalitang tungkol sa drugs at casino.
Pero sabi naman ni Sunshine, “Sa drugs, literal na malabo yun, hindi siya ganoon.
“Sa casino, aminado naman siya, dati pa na napagdaanan niya yun.
"Pero noong time kasi na medyo okay-okay na siya, sinabi naman niyang hindi.
"Pero may mga lumalabas pa ring balita, so hindi namin alam kung ano ba talaga.
“Siguro marami kasing naging problema sa opisina namin.”
Ang tinutukoy ni Sunshine ay ang FOCUS Entertainment na pinamamahalaan ni Joy.
“Maraming naging internal problems ang Focus kasi.
"Siyempre, personal nila, yung management, mga kasama niya na hindi na rin naman namin puwedeng pakialaman.
"At wala rin naman kami sa lugar para mag-say, ‘di ba?
"Basta ang sinabi lang ng mga anak niya sa amin, bakasyon, pahinga na lang muna."
Dadalawin na lang daw ni Sunshine ang talent manager kapag ready na ito.
Aniya, "Kasi kapag nakita kami, imposibleng hindi ‘yan umiyak.
“Kilala namin yun na medyo matapang, pero alam namin na emotional.”
BANANA SPLIT. Malaking bagay raw para kay Sunshine na maging bahagi ng Banana Split, kung saan apat na taon na raw siyang mainstay rito.
Saad niya, “Masaya, at the same time nagtatrabaho at kumikita ka.
"Para ka lang naglalaro at kumikita ka pa.
"Yun naman ang palagi naming sinasabi."
Kahit daw maituturing na mas sikat o kilalang artista ang ibang cast, hindi raw niya naramdaman kailanman na mas mataas ang mga ito sa kanya.
Sabi ni Sunshine, “Sina Angge [Angelica Panganiban], sina Z [Zanjoe Marudo], Praty [John Prats], Ryan Bang... lahat sila.
"Walang ano na, 'O, Angelica [Panganiban] ako ha,' walang ganun.
“Once na magsama-sama, puwede mo silang biru-biruin.”