Inamin ni Jericho Rosales na madalian ang taping ng The Legal Wife ngayon, dahil ilang araw siyang naka-leave of absence para sa nakatakdang kasal nila ni Kim Jones sa May 1, Huwebes.
Ngunit ipinaliwanag ng aktor na hindi ibig sabihin ay mayroong special treatment ang produksiyon ng ABS-CBN para sa kanya.
Ang totoo ay nagpang-abot ang schedule ng kasal nila ni Kim at ng primetime soap na pinagbibidahan niya dahil sa mga hindi inaasahang delay sa pag-ere ng The Legal Wife.
Bukod sa “internal problems” kaugnay ng proyekto, lalo pa raw itong naantala nang maganap ang trahedyang dulot ng bagyong Yolanda noong 2013.
Saad ni Jericho, “Yung wedding namin ni Kim, hindi mo naman puwede i-move yun, ‘di ba?
“That’s why everything was pegged sana months before.
"The Legal Wife was supposed to end siguro mga two or three months ago. So, na-delay lahat.
“And then, yung show namin sa Malaysia, na-delay din. Domino effect na.
"So, kinailangan kong magsabay ng dalawang soap, which I don’t actually do.
“Ang life ko, hotel, airports, [at] set. Bihirang-bihira ako [mapirmi] sa bahay.
“I’m flying in and out [of the country] for the last four months.
"So, that was the reason."
Nakapanayam ng PEP.ph (Philippine Entertainment Portal) at ilan pang entertainment reporters pagkatapos ng presscon ng The Legal Wife kahapon, April 24.
Bagamat ilang araw lamang siyang mawawala, aminado si Jericho na naapektuhan ang schedule ng taping ng The Legal Wife, lalo pa’t karamihan sa mga itine-tape nila sa isang araw ay agad ding ipinapalabas kinagabihan.
Ganunpaman, nagkompromiso na lang ang soon-to-be-married couple sa pamamagitan ng pag-postpone ng kanilang pinaplanong honeymoon trip.
Pagkatapos ng gaganaping kasal nila ni Kim sa Boracay, babalik agad sila ng Manila at magpapahinga ng ilaw araw, bago muling sasabak sa taping ang Kapamilya actor.
Kasabay nito ay ang pinabulaanan ng aktor ang espekulasyon na magtatapos na ang The Legal Wife sa Mayo.
Paglilinaw pa ng Kapamilya actor, “No, we are still taping in May. In fact, pinush namin yung honeymoon namin.
“We both agreed na mag-give way muna tayo sa work.
“It’s a little bit frustrating on my side, I guess. Hindi namin maiwasan kung ano yung nangyaring problema.
“But she [Kim] was very understanding.
“In fact, the production sent her flowers for offering to delay, to postpone our honeymoon.”