Wala pang direktang pahayag si Mark Herras tungkol sa pagkawala niya sa weekly musical-variety show ng GMA Network na Sunday All Stars.
Nang makausap siya ng PEP.ph (Philippine Entertainment Portal) matapos mag-guest sa Startalk kahapon, Linggo, May 25, sa umpisa’y ayaw magsalita ng aktor.
Aniya, “Tahimik na lang ako. No comment!”
Pero nahikayat din namin si Mark na magpahayag ng kanyang panig.
May balita kasing kaya raw siya natanggal sa Sunday All Stars ay dahil sa nabitawan niyang pahayag sa isang panayam na lumabas dito sa PEP, kung saan may nabanggit siyang hindi maganda tungkol sa show na kinabibilangan pagkatapos ng reformat dito.
Saad ni Mark, “May sinabi ako pero… alam naman natin na minsan kapag may nasabi ka, iba ang nagiging interpretation o mas napapalaki.
“So ngayon, ako naman, tahimik na lang ako about that issue.”
Diretsahan naming tinanong ang Kapuso actor kung suspended lang ba siya o tinanggal na talaga sa Sunday All Stars.
Tugon niya, “I don’t know pa po. Hindi ko pa alam.”
Pero totoo bang ipinatawag siya ng management para sa isang meeting hinggil sa sinabi niyang “boring” na ang Sunday All Stars?
Tugon ni Mark, “May pag-uusap kasi siyempre I need to explain my side, ‘di ba?
“Pero ‘yon, kung anuman yung magiging desisyon.
“I’m just waiting lang naman kung ano yung magiging desisyon nila.
“So far, ngayon, I’m just enjoying my weekend, lalo na ngayong wala na kaming Rhodora X.
“I’m free kapag Saturday and Sunday, ‘di ba? So, ‘yon! Mas magkakaroon ako ng time with Ada.”
Si Ada ay ang anak ni Mark na nakatakdang binyagan sa May 28.
CHRISTENING. Sinu-sino ang celebrities na kinuha niyang mga ninong at ninang?
Sabi ni Mark, “Yung Batch 1 ng StarStruck, kumpleto po.
“And then, sa mga kaibigan ko naman, ninong sina Dominic Roco, Alwyn Uytingco, Matt Evans, Carlo Aquino, Paolo Contis, Rocco Nacino, Enzo Pineda, Steven Silva, Gian Magdangal, Jay-R.
“Kabilang sa mga ninang naman sina Winwyn [Marquez], Yassi [Pressman], Tita Geleen [Eugenio], Aicelle [Santos], Maricris [Garcia], Frencheska [Farr], Chariz Solomon.
“Actually, marami sila... almost lahat ng taga-Sunday All Stars, naroon.
“And then si Direk Mark Reyes, ‘tapos si Kuya Perry Lansigan.”
NEXT PROJECT. Magtatapos na ang primetime series ng GMA na Rhodora X, kung saan kasama si Mark. Huling episode na nito sa Biyernes, May 30.
Hindi pa raw alam ni Mark kung ano ang kasunod na project na kanyang gagawin.
“Wala pa pong naibabalita sa akin. Naghihintay lang ako ng abiso kung ano ang next.
“Actually, ako naman, kung bibigyan agad ako ng kasunod na project, siyempre kukunin ko.
“Pero sa ngayon, habang wala pa, siyempre mas makakapag-focus muna ako sa gym.
“Kung noong may Rhodora X, nakakapag-gym ako ng MWF o three times a week.
“Ngayon, makakapag-gym ako ng almost every day.
“And a lot of inquiries na ang dumating sa amin about regional shows.
“So, ‘yon, iga-grab ko munang lahat ‘yon.
“And then, iyon na rin ang parang bakasyon na ginagawa ko.”
Kaugnay ng pagwawakas ng Rhodora X, marami raw mami-miss si Mark.
Aniya, “Mami-miss ko lahat, the whole cast of Rhodora X. Especially si Jen [Jennylyn Mercado] at saka si Yas [Yasmien Kurdi].
“Ako, ilang taon na ba ulit ang lilipas bago kami magkasama na naman ni Jen, ‘di ba?
“And then, mami-miss kong makatrabaho ulit sina Ms. Glydel [Mercado], sina Kuya Gardo [Versoza], and the whole cast.”
JENNYLYN MERCADO. Balitang sa mga huling taping days ng Rhodora X ay naging kapuna-puna na sobrang sweet diumano sina Mark at Jennylyn sa isa’t isa. May mga naghihinala tuloy na baka nagkabalikan na sila.
Reaksiyon dito ng Kapuso actor, “Actually, kami ni Jen, siguro mas naging close lang kami siguro dito sa Rhodora X.
“And I’m so happy and thankful kay Jen dahil, alam mo ‘yon, hindi kami nagkaroon ng problema doing our scenes together.
“Lalo na yung mga scenes namin na kailangan naming mag-kiss or may love scenes na ginagawa, wala… wala kaming naging problema.
“And at the same time, masaya ako na 'eto, natapos man ang Rhodora X, pero mas pinagtibay nito ang relationship namin ni Jen na magkaibigan.
“At bilang ako yung ninong ni Jazz at siya ang magiging ninang ni Ada, so saradong magkumare na kami ni Jen!” tawa niya.
Si Jazz ang anak ni Jennylyn sa dating nobyo nitong si Patrick Garcia.
Pareho silang single ngayon ni Jennylyn, kaya may mga fans na hindi pa rin nawawalan ng pag-asa na baka posibleng maging sila pa ring dalawa sa bandang huli.
Sabi ni Mark tungkol dito, “Ako naman kasi, sabi nga namin before pa naman na mag-start yung Rhodora X, hindi natin alam kung anong puwedeng mangyari, e.
“I mean, during and after Rhodora X, na sasabihin nating okay, walang nabuo sa amin ni Jen, pero mas tumibay yung pagkakaibigan namin.
“Malay natin… hindi pa naman huli ang lahat.
“Siguro after Rhodora X or someday, ‘di ba? We’ll see… we’ll see.”