Buntis na si Ciara Sotto habang ginagawa niya ang pelikulang Hari Ng Tondo, na entry sa nakaraang Cinemalaya Independent Film Festival at ipalalabas na sa regular cinemas simula sa October 1.
Kaya marami sa mga nakapanood na ng pelikula ang nagtatanong kung paano nakayanan ni Ciara ang mga eksenang sinasaktan siya ni Gian Magdangal, na gumaganap bilang live-in partner niya.
Sa panayam ng PEP.ph (Philippine Entertainment Portal) kay Ciara sa press conference ng Hari Ng Tondo noong Martes, September 24, sinabi ng actress-singer na tinotoo nila ni Gian ang mga eksena nilang sakitan.
“Totohanan talaga yung kapag nananakit siya. Hindi talaga madadaya.
“Minsan may pasa ako, si Cris [Villonco] rin, nasaktan din.
“Pero okey naman siya, kasi nakakatulong naman sa eksena yung ginagawa niya [Gian].”
Hindi pa raw alam noon ni Ciara na buntis siya sa una nilang anak ng mister niyang si Joe Oconer.
Dahil pisikalan ang karamihan ng mga eksena ni Ciara sa Hari ng Tondo, tinanggap pa rin kaya niya ito kung alam niyang buntis na pala siya?
Saad niya, “Actually, hindi ko po alam.
“Siguro noong start ng film, baka hindi pa ako pregnant nun, siguro yung ibang shooting days.
“Pero baka naman kung alam din nila na buntis ako, hindi in-offer yung role sa akin.
“Pero ‘buti na lang din, God’s timing.”
Kinabahan ba siya nang malaman niyang buntis siya at may mga eksenang bugbugan?
Ayon kay Ciara, “Mas kinabahan ako sa mga ginawa ko sa Celebrity Dance Battle [TV5] because I had to rehearse every day and we're trying to lift and stunts ng partner ko, so that was scary for me.
“Pero yun nga, hindi ko naman nalaman na buntis ako until nag-final na.”
FIRST TRIMESTER. Limang buwan na ngayon ang dinadala ni Ciara.
Kumusta ang first trimester ng pagbubuntis niya?
Ayon kay Ciara, “Medyo mahirap yung first trimester.
“Kasi, may maamoy ka lang, nasusuka ka na. Palaging nahihilo.
“Pero ngayon, hindi na ganun. Nabawasan na.
“Usually kasi, sa gabi ako nahihilo, nasusuka.
“E, ‘di ba, yung iba, morning?
“Kaya sabi ko nga, parang evening sickness yata!”
May mga ayaw ba siyang kaining pagkain?
“May time kasi, I was eating Korean foods.
“Ako, gusto ko siya, ‘tapos biglang nilabas ko siya.
“Kaya now, takot na akong kumain ng Korean foods. Hindi ako kumakain ng Korean foods for now.”
Ano naman ang pinaglilihian niya?
“Wala nga, e, siguro Japanese foods, pero nothing in particular.
“Parang palagi akong naghahanap ng sushi.”
Kung mayroon man daw hindi nagagawa ngayon si Ciara dahil buntis siya, ito ay ang pole dancing.
“Wala munang pole dancing!” natawa niyang sabi.
“Siyempre sa akin, big deal yun, kasi yun ang ginagawa ko halos every day.
“’Tapos, lahat ng students ko, sinasabi, ‘Miss ka na namin.’
“Kasi, hindi ako puwedeng magturo for now.
“Kaya sabi ko, ‘Sige, wait lang tayo.’
“At saka siyempre, bawal din magpuyat.
“Actually, ang daming bawal. Bawal pumunta sa patay…
“Ewan ko ba… merong sinasabi sa akin.
“Parang ang daming bawal puntahan. ‘Tapos, bawal kumain ng raw.
“So, lahat ng sushi na inu-order ko, yung hindi raw.”
HOPING FOR A GIRL. Hindi pa raw nila alam ang gender ng anak.
Pero kung puwede raw siyang mamili, gusto ni Ciara na babae sana ang maging panganay nila.
“Pero for me, sa tagal ko nang hinintay ‘to, parang wala na akong karapatang mamili.
“Actually, they said, noong ultrasound ko, pero early pa kasi, parang boy raw ang nakita nila.
“Pero hindi pa sila sure, kasi nga, maaga pa masyado.”
Ikinasal sina Ciara at Joe noong 2010.
Mayroon na silang naiisip na maging ninong at ninang ng anak?
“For sure, my sisters, Ate Sharon [Cuneta-Pangilinan]…
“Lahat naman kaming magkakapatid, ninang ng anak nila at saka ninang si Ate Sharon.”
Excited na raw ang mommy niya na si Helen Gamboa sa pagdating ng anak niya.
Kuwento ni Ciara, “Noong malaman ng mommy ko, nagtatalon!
“Kasi nga, ang tagal ko nang kasal, four years na kaming married, ‘tapos ngayon lang dumating.
“’Tapos, bunso pa ako.”
SHARON CUNETA. Kinumusta rin ng PEP kay Ciara ang kanyang pinsan na si Sharon at sa ipinagtapat nitong pinagdaanang depresyon.
Sabi naman ni Ciara, kasama lang nila ang pinsan noong Linggo ng gabi.
“I was with her last night. We had a reunion at makikita mong sobrang positive ni Ate ngayon.
“Ang ganda ng aura niya and she looks really good.
“’Tapos, meron siyang mga ikinukuwento na mga updates about her, which I really can’t say for now, kasi mas mabuting sa kanya galing.
“Pero makikita mong very positive siya ngayon and she’s able to rise above it agad.”
Inamin ni Ciara na alam niya ang pinagdaanan ng Megastar.
“Alam namin yun na na-depress siyang talaga.
“Wala siyang gana. Parang she was so unhappy.
“Pero baka nga yun yun, midlife crisis yun, at baka naman lahat tayo pagdaanan yun.
“Pero ngayon, I think she has a better relationship with God din kaya makikita mong ang ganda ng aura niya now.
“Super-saya siya.”
Yung panahon na depressed si Sharon, paano niya ipinakita ang suporta rito?
Saad ni Ciara, “Tini-text namin siya and update din about her mom [Elaine Cineta].
“As a family, we kept on checking on Tita and we wanna keep checking on her [Sharon] rin, kasi baka naman siya ang hindi okey.
“But I can assure you that right now, she’s really, really in a good shape.”
Ang ina ni Sharon na si Elaine Cuneta ay kasalukuyan pa ring nasa Intensive Care Unit (ICU).
Sabi pa ni Ciara, “Nandoon pa rin, pero nag-i-improve naman daw. Pero they have to watch her closely.”