Si Jennylyn Mercado ang calendar girl ng Tanduay para sa taong 2015.
Pinalitan niya bilang calendar girl ng naturang rhum brand ang kapwa niya Kapuso star na si Heart Evangelista.
Pahayag ni Jen tungkol dito, "Siyempre parang mahirap sundan yun, e, Heart Evangelista yun, so medyo may pressure."
Hindi naman daw siya naging mas daring sa pictorials dahil si Heart ang kanyang sinusundan bilang calendar girl.
“Actually, nakakatawa, nagpa-autograph pa ako sa kanya nun, nung lumabas yung mga kalendaryo niya.
“Humingi ako ng isa 'tapos nagpa-autograph pa ako.
"Hanggang ngayon, naitago ko pa rin. Alam ni Heart yun."
Pangarap ba niya noon ang maging calendar girl?
Saad ng 27-year-old actress/singer/TV host “ Hindi naman, pero yung opportunity, habang may offers, sige, okay.”
Nakausap ng PEP.ph (Philippine Entertainment Portal) at iba pang miyembro ng media si Jennylyn sa launching ng Tanduay Calendar 2015 kahapon, December 4, sa 55 Events Place, Sct. Rallos, Quezon City.
(Photo by Noel Orsal.)
TWO WEEKS PREPARATION. Si Jennylyn daw ang kauna-unahang calendar girl ng naturang brand na may anak na. Kaya naman daw masaya ang Kapuso star na siya ang napili para sa taong 2015.
Paano ba siya napa-oo na gawin ang sexy pictorials niya para sa kalendaryo?
Kuwento ni Jennylyn, “Bago naman ako umoo, ipinakita muna sa akin ang peg.
"And alam ko naman yung limit ko, e, yung limitations, kung hanggang sa'n lang talaga ako puwede.
“So, why not? Kasi once in a lifetime lang 'to.
"So, sabi ko, habang kaya ko pa, habang kaya pa ng katawan ko and meron pa namang... toned pa naman ako kahit papa'no, sige.”
Dahil sa dami ng pinagkakaabalahan, dalawang linggo lang daw niyang pinaghandaan ang naturang pictorial.
“Oo, kasi wala naman talaga akong oras na mag-training for it, e.
“So, nag-request ako ng two weeks para paghandaan 'to. Kasi nakakahiya naman kung i-edit lang nila, ‘di ba?”
Nakita na ba ng anak niyang si Alex Jazz ang mga kalendaryo niya?
Tugon ni Jennylyn, “Hindi ko pa napapakita, pero wala namang... ano naman siya, e, hindi niya tinatanong.
“Kasi kami naman, as much as possible, mas maingat kami sa mga ganyang bagay.
"Lalo na baby pa siya, wala pa siyang alam sa mga ganun, so tago lahat ng mga magazines.
"Yung mga pinapanood niyang palabas, alam na namin kailangan yung mga cartoons lang, or inspirational, ganun lang.
“Hindi kami nagpapanood ng mga news, soap opera, never pa.”