"Phillip Salvador, nagwawala at nagsisisigaw...Right this minute. Parang may kaaway na foreign man."
Ito ang feed na nakarating sa PEP.ph (Philippine Entertainment Portal) kahapon, 1 P.M, December 15, tungkol sa insidenteng nangyari sa Sbarro, isang Italian restaurant sa Building A ng SM Megamall, sa Mandaluyong City.
Kinasangkutan nga ito ni Phillip at ng isang foreign national na tinukoy bilang Norwegian.
Ayon pa sa PEP source, nakipagpalitan si Phillip ng mga maaanghang na salita dahil "the foreigner customer pala said 'stupid' to a Sbarro server."
At ipinagtanggol daw ng aktor ang server na ininsulto ng Norwegian, na may kasamang Filipino bodyguard.
Sabi ng PEP source, "Phillip was literally screaming on top of his lungs..."
Nakausap ng PEP ngayong umaga, December 16, si Phillip at hindi niya itinanggi ang kuwento.
Sinabi ni Phillip na hindi niya napigilan ang sariling kausapin ang Norwegian dahil tinawag nitong "stupid" at "bunch of idiots" ang Filipino staff ng restaurant.
Hindi raw lumaban o sumagot ang mga hinamak na restaurant staff dahil takot na mawalan ng trabaho.
PHILIP'S STORY. Ayon pa sa aktor, nagalit ang Norwegian dahil hindi nasunod ang gusto niya sa spaghetti na kanyang in-order.
Kasama ni Phillip ang misis niyang si Emma Karen Ledesma at patapos na silang kumakain nang marinig nila ang pagwawala ng Norwegian na may taas na 6'3" at mid-40s ang edad.
Hindi raw nakatiis si Phillip nang marinig nito ang pang-aalipusta ng Norwegian sa umiiyak na waitress.
Tumayo raw siya, nilapitan ang nagagalit na customer at pinagsabihang huwag tawagin na "stupid" at "bunch of idiots" ang mga Pilipino.
Ang galit na galit na tanong ng Norwegian kay Phillip: “Who the fuck are you?”
Ang balik-sagot ni Phillip: “I’m the f*cker who’s gonna beat your ass if you don’t apologize to them."
Sabi ng Norwegian, "I will call the police,” na sinagot ni Phillip ng, “Hurry up! Please tell them to be here in five minutes, and I will tell them to throw you out of this place.
"You don’t insult the Filipinos. Let’s get out of this place, I’m gonna fight you.
"You only know how to scream at girls!”
Samantala, ikinuwento ng isang eyewitness na marami ang umawat sa dalawa at may mga customer pang kinunan ng video ang eksena gamit ang kanilang mga cellphone camera.
Pero hindi raw nababahala si Phillip kung sakaling kumalat ang video dahil ipinagtanggol lamang niya ang mga kababayan na inaapi ng isang dayuhan.
Ayon pa kay Phillip, iginigiit ng Norwegian na mali ang order niya na ibinigay ng waitress.
Para kay Phillip, kung may pagkakamali man ang waitress, hindi tama ang pang-iinsulto na ginawa ng Norwegian na pinanghahawakan ang salita na “the customer is always right.”
Sinabi rin ng eyewitness na biglang umalis sa restaurant ang Norwegian dahil nakita at naramdaman nitong hindi siya uurungan ni Phillip.
Bukas ang website na ito sa pahayag ng Norwegian at maging sa pamunuan ng Sbarro.