Robin Padilla to Senator Alan Peter Cayetano: "Wala akong personal na hangarin laban sa inyo."

Pinabulaanan ni Robin Padilla na may kinalaman sa pulitika ang pagtuligsa niya sa posisyon ni Senator Alan Peter Cayetano kaugnay ng pagpasa sa Bangsamoro Basic Law (BBL).

Isa si Senator Cayetano sa tutol na maipasa ang nasabing batas.

Matatandaang sa ginanap na forum para sa first anniversary ng peace agreement sa pagitan ng gobyerno at Moro Islamic Liberation Front (MILF), noong March 28, sinabi ng aktor na huwag sanang maging padalus-dalos ang mga mambabatas, tulad ni Senator Cayetano, sa pagtuligsa sa BBL.

Naantala ang pagpasa ng BBL dahil sa madugong trahedya sa Mamasapano, Maguindanao, na ikinasawi ng 44 miyembro ng Special Action Force (SAF) ng Philippine National Police (PNP).

Ngunit sa kanyang Instagram post kahapon, March 30, ipinaliwanag ni Robin na wala siyang masamang intensiyon sa pagbanggit niya kay Senator Cayetano.

Pahayag ng aktor, “Sir Senator Alan Cayetano, una po sa lahat ay wala pong kulay ng pulitika ang aking mga mungkahi patungkol sa inyo sa usapin ng BBL.”

Nakarating kasi kay Robin ang sinabi ni Senator Cayetano sa isang panayam ng dzMM na kaya siya “tinutuligsa” ng aktor ay dahil kaalyado nito ang pamilya Tinga, na dating kalaban sa pulitika ng senador sa lungsod ng Taguig.

Ngunit iginiit ni Robin hindi niya personal na kinakalaban si Senator Cayetano.

Ayon pa sa aktor, walang kinalaman ang pakikipaglaban niya para sa BBL sa pagiging malapit niya kay Rica Tinga, na kumandidato bilang alkalde sa Taguig City noong May 2013 elections.

Ang maybahay ni Senator Cayetano na si Mayor Lani Cayetano ay kasalukuyang nanunungkulan bilang alkalde ng Taguig mula 2010.

Patuloy na paliwanag ni Robin, “Gusto ko pong linawin na hindi po ako direktang nakasuporta sa mga Tinga, ako po ay sumusuporta sa aking asawa at sa kanyang kaibigan na si Rica Tinga.

“Kung makakakuha po kayo ng aking talumpati noong gabi ng kampanya, malinaw po doon ang aking hangarin sa mga Tinga ay ang aking kampanya laban sa political dynasty at pork barrel.”

Pinabulaanan din ni Robin ang pahayag ni Senator Cayetano na inimbitahan siya ng senador na bumisita sa Maharlika Village, sa Taguig City, upang makita ang mga development sa naturang Muslim community.

“Wala po akong natatanggap na imbitasyon mula sa lokal na gobyerno ng Taguig para mabisita ang inyong magagandang gawa.”

Diin pa ng aktor, “Sir Senator, wala akong personal na hangarin laban sa inyo.

"Ako po’y isang rebolusyonaryo na ang hawak ay katotohanan.

“Maraming salamat po sa pagbibigay ng panahon sa aking mga saloobin.

"Mabuhay ang katipunan at ang mga anak ng bayan.”

Isa si Robin sa mga bukas sa pagsuporta sa pagpasa ng BBL na itinuturing niyang isang magandang oportunidad upang tuluyang makamit ang kapayaan sa pagitan ng gobyerno at MILF.

No one from the senate or the congress were present.it could have been beneficial for the country if our lawmakers heard the historians/doctors of Academe point of view of the Bangsamoro History, People and Struggle. Napakagandang paglalahad nila Dr Ma Bernadette G Aberra ng Unibersidad ng Pilipinas,Dr Cecilia B Tangian ng Mindanao State University,Dr Ricardo Trota Jose ng Unibersidad ng Pilipinas at Dr Renato T Oliveros ng Pamantasan ng Lungsod ng Maynila.Maraming salamat sa National Historical Commission of the Philippines sa makabuluhang araw na ito para sa Filipino at Inangbayan. Mabuhay po kayo Chair,Maria Serena I Diokno ng Komisyon at Bb Paulita Avestruz.

A photo posted by robin padilla (@robinhoodpadilla) onMar 26, 2015 at 9:34pm PDT