Patuloy ang paninindigan ng ABS-CBN news anchor na si Ces Drilon na huwag paburan ang mungkahing ilibing ang diktador at dating pangulo na si Ferdinand Marcos sa Libingan ng mga Bayani.
Sa kanyang Instagram post kamakalawa, sinagot ni Ces ang ilang netizens na pumapabor na ilibing si Marcos sa Libingan ng mga Bayani.
Nagsimula ito nang mag-post ang news anchor ng isang report tungkol sa World War II veteran na si Conrado B. Rigor Sr.
Kuwento ni Ces, nakipag-ugnayan sa kanya ang pamilya ng pumanaw na sundalo upang basagin ang kanilang katahimikan tungkol sa pagharang ni Marcos na maikuwento ang kabayanihan ni Rigor sa Bessang Pass, at upang lumabas na bayani ang dating pangulo.
Ayon pa sa caption, si Marcos ang nagbigay ng eulogy ni Rigor noong 1960 dahil magkaibigan ang dalawa.
Kaibigan din ni Marcos ang asawa ni Rigor na si Erlinda.
Noong 1964 nailathala ang biography ni Marcos at iprinoklama siyang bayani ng Bessang Pass.
Nagsilbing sekretarya ni Marcos si Erlinda noon kaya siya nanahimik.
Pero dahil sa pagpayag ni Presidente Rodrigo Duterte na mailibing si Marcos sa Libingan ng mga Bayani, nagdesisyon ang mga kaanak ni Rigor na magsalita.
Magkahalo ang mga komento sa nasabing Instagram post ni Ces. May mga sumasalungat sa kanya at mayroon ding sumasang-ayon.
May mga nagsabing mag-move on na sa isyu at payagan nang mailibing si Marcos sa Libingan ng mga Bayani.
Sinagot ito ni Ces.
Sabi niya, makakapag-move on lamang kung makakamit ang hustisya.
Dapat na rin daw itigil ng pamilya Marcos ang kanilang obsesyon na mailibing ang dating diktador sa Libingan ng mga Bayani.
“Moving on can only begin with justice and atonement.
“It is the Marcos family that should move on and stop their obsession to bury FM in the Libingan ng mga Bayani.
“We should celebrate integrity and honor it. It is so glaring that FM did not have it.”
