Kuntento si Christian Bautista sa takbo ng kanyang career, kahit hindi man siya ang lead sa karamihan ng mga proyektong ginagawa niya.
Sa kasalukuyan, abala si Christian sa pagpu-promote ng theater play na Jersey Boys: The Story of Frankie Valli & The Four Seasons.
Kasama niya rito sina Nyoy Volante, Markki Stroem, at Nino Alejandro.
May recurring role din siya bilang Apitong sa teleseryeng Encantadia at isa siya sa mga hurado sa Superstar Duets. Parehong napapanood sa GMA Network ang dalawang programa.
Magkakaroon din ng concert si Christian kasama si Julie Anne San Jose sa November.
Excited ang singer-actor na bumalik sa pagkanta, gaya ng Jersey Boys na mapapanood sa Meralco Theater mula September 23 hanggang October 16.
“Last year I did a lot of acting: My Mother’s Secret, Strawberry Lane.
“I miss the theater kaya nag-theater ako ulit,” sabi ni Christian nang makausap ng PEP.ph (Philippine Entertainment Portal) sa presscon ng nasabing musical play nitong Miyerkules, September 14.
OKAY WITH SUPPORTING ROLES. Inusisa ang Kapuso star kung hindi ba isyu sa kanya na karamihan sa kanyang mga proyekto ngayon ay support roles o bahagi siya ng grupo.
Tugon niya, “I’m okay, because sa Oscars, meron din naman nananalong Best Supporting Actor na Christian Bale.”
Napanalunan ni Christian Bale ang nasabing award sa Oscars noong 2015 para sa pelikulang The Big Short.
Dagdag pa ni Christian Bautista, “I can’t be lead all the time. We always have to experience sometimes ensemble or support.
“And there’s less pressure also. If I’m lead in all, I can’t do it. Di ko magagawa.
“First, if you’re lead in a soap, you have to be there every single day.”
Sa musical play na Jersey Boys, si Nyoy ang gaganap na Frankie Valli, ang pinakabida.
“Here, Nyoy really has the hardest job kasi napakadami niyang ginagawa.
“But we're here to support him and always back him up, so it’s okay.”
MORE TIME FOR PERSONAL LIFE. Kuwento pa ni Christian, ngayon lang siya natutong gumamit ng Google Calendar.
“Andun lang talaga lahat. Ilagay mo date, time, family time, lagay mo ang gym, tapos babasahin mo lahat, 'Eto gagawin ko.'
“It’s organized. Hindi ko makakalimutan. It’s really how to balance it.
“I can be such a workaholic also na that all I do is work.
“Unfair din naman yun sa relationship and my family, so kailangan meron din akong set-aside time for them. Para holistic.
“I’m not getting any younger.”
Mas gusto raw ni Christian na nababalanse niya ang oras sa trabaho at personal na buhay.
“Sometimes we get caught up too much in our work, it becomes our life, so hindi rin masyadong maganda.
“Gusto ko may family time pa rin. Mas nagiging normal.”