Hindi apektado si Iñigo Pascual sa bashers ng viral kissing video nila ng amang si Piolo Pascual.
Nang makapanayam ng PEP.ph (Philippine Entertainment Portal) si Iñigo pagkatapos ng premiere ng Northern Lights: A Journey To Love kagabi, March 28, sinabi nitong hindi niya problema kung ano ang iisipin ng iba sa pagpapakita niya ng pagmamahal sa ama.
Saad niya, “Siguro sa akin, comment ko na lang dun, sa akin, hindi negatibo na kung sa mata ng ibang tao ay malisyoso yun, hindi na namin problema yun.
“Dahil hindi naman namin pag-iisip yung sa mga tao na malisyoso ang pag-iisip. Sila na yung may problema.”
Pagpapatuloy niya, “At saka hindi ko babaguhin yung trato ko sa mga parents ko, sa grandparents ko, sa sinuman dahil sa sinasabi ng ibang tao.
“Siguro, whatever they think is right for themselves, do it.
"But I just won't acknowledge yung mga hate na binibigay nila sa amin."
Sa katunayan, gusto raw ni Iñigo na maging inspirasyon ang nasabing video para sa kabataan para hindi magbago ang trato sa kanilang mga magulang dahil lang tumanda na ang mga ito.
Pagbabahagi niya, “Para sa akin siguro, I’ll make it more of an inspiration to the generation na kahit matanda ka na, dapat hindi mo baguhin yung trato mo sa parents mo dahil hindi mo alam kung kailan mawawala yung loved ones mo.
“You gotta show the love. At saka hindi masama maging physically expressive for your love for your parents.”
Sa katunayan, nakuhanan pa si Iñigo na yumakap sa kanyang ama pagkatapos ng screening ng Northern Lights sa SM Megamall kagabi.
Una nang nagpahayag si Piolo tungkol sa video nila noong huling presscon na ginanap para sa Northern Lights noong March 20.
Ang sabi niya, "It’s a blessing kung ginagawa sa akin ng anak ko yun, kasi ganun ako pinalaki ng magulang ko.”
Interview by: Allan Sancon