Patuloy pa ring umaasa si Bacoor City Mayor Lani Mercado na mabigyan ng pansamantalang kalayaan ang asawa nitong si Bong Revilla, na kasalukuyang nakapiit sa custodial center ng Camp Crame dahil sa plunder.
Ang umaasang kuwento ni Lani, “Makapag-bail man lang. Makalaya man lang si Senator Bong, yun lang kasi, magtatatlong taon na talaga, e.
“Nalulungkot nga ako kasi merong supposedly hearing bukas, Thursday [April 20], pero na-postpone, na-move ulit for next week.
"Pero ang kagandahan nun, mas kumonti yata ang mga witnesses na isasalang so mas masu-shortened 'tsaka twice ang hearing sa isang araw.”
Matatandaang nag-ugat ito sa umano'y pag-a-allocate ng pork barrel ng dating senador mula 2006 hanggang 2010 sa sinasabing bogus foundations ng alleged mastermind na si Janet Lim-Napoles.
Inakusahan ang action star na tumanggap ng P224.5 million.
Sa tingin ni Lani ay political persecution ang nangyari, pero positibo pa rin ang aktres na mabibigyan ng hustisya ang pagkakakulong ng asawa.
Saad pa niya, “Alam mo nakakalungkot yung mga nagaganap, pero nakikita mo rin naman na yung mga paratang nila kay Senator Bong, lumalabas gawa-gawa rin, na ultimo sila mismo, meron din silang ginagawa na anomaly, so yun yung mga developments.
“Ang akin lang, ayoko na tingnan yung mga pagkakamali nung mga gumawa nang masama kay Senator Bong...Ang akin lang mabigyan ng hustisya si senator, yun lang.”
Nakausap ng PEP.ph (Philippine Entertainment Portal) si Mayor Lani sa selebrasyon ng ika-80 kaarawan ni Manila Mayor Joseph Estrada noong Miyerkules, April 19, sa Fiesta Pavillion ng Manila Hotel.
LANI AS MAYOR. Kahit na mabigat ang dinadalang problema dahil sa sitwasyon ng asawa, hindi naman daw apektado ang kanyang trabaho sa Bacoor, Cavite bilang alkalde.
Saad niya, “So far so good. Nabigyan tayo ng pagkilala ng Superbrands Marketing as one of the most outstanding mayors ng bansa so nagpapasalamat tayo.
"And hopefully tuluy-tuloy towards my first year as mayor.”
Bago nito, nagsilbi rin si Lani bilang kongresista ng second district ng Cavite. Alin sa dalawang posisyon kaya ang mas nagustuhan niya?
Tugon nito, “Iba-iba yung ano e sense of fulfillment.
"Mas matrabaho ang executive. Mas matrabaho pero mas iba naman yung level of fulfillment mo kasi direct ka talagang tumutulong sa tao, mas madami kang sinu-solve na problema, both big and small.”