Hindi napigilang mapaluha ng aktor na si Mark Anthony Fernandez sa pagdinig ng kaso niyang transportation of illegal drugs, sa Angeles City Regional Trial Court, kahapon, June 8.
Ayon sa ulat ng 24 Oras kagabi, iniharap ng prosekyusyon ang naunang interview kay Mark Anthony kung saan sinabi nitong personal niyang gagamitin ang nakuhang marijuana sa kanyang kotse.
Isinunod namang isinalang ang follow-up interview kay Mark Anthony, kung saan sinabi nitong hindi sa kanya ang marijuana at bibilhin lamang niya ito.
Ibig sabihin ay salungat ang sinabi ng aktor sa magkahiwalay na interviews.
Nakapagbigay pa ng maiksing statement ang aktor sa panayam ng 24 Oras.
Depensa niya, “Though yung sa ano, hindi na nagkaintindihan. Ang sinasabi ko dun, binibili ko pa lang [ang marijuana].”
Nakatakdang ituloy ang pagdinig ni Mark Anthony sa June 21.
October 3, 2016 nang mahulihan ang aktor ng isang kilong marijuana sa loob ng kanyang kotse sa isang checkpoint sa Angeles City.
Naka-detain si Mark Anthony sa Pampangan Provincial Jail.