Aminado si Richard Gomez na nakaramdam siya ng kaba nang dumalo sa prom night ang nag-iisang anak na si Juliana Gomez, lalo nang sinundo ito ng childhood friend niyang si Santi Belmonte.
May tiwala naman daw sila ng misis niyang si Lucy Torres-Gomez sa ka-date ni Juliana nung gabing yun, pero hindi raw niya maiwasang kabahan at pawisan.
Pinuna rin daw ni Richard ang mataas na slit ng gown na suot ng kanyang 16-anyos na unica hija.
“Medyo nagpapawis, e!” natatawang sabi ng mayor ng Ormoc City sa PEP.ph (Philippine Entertainment Portal).
Patuloy niya, “Siyempre dalaga na yung anak mo, di ba?
“Buti na lang medyo mabait naman yung ka-date niya.
“Alam mo naman, nung bata-bata ako, medyo pilyo ako pagdating sa mga ganyan, e.
“Kaya nga sinasabi ko kay Juliana, ‘Juliana, nung edad mong ‘yan, talagang yung mga dini-date ko, talagang hindi ako umuuwi kung hindi ko nakahalikan yung ka-date ko, e.’ Tawa lang siya sa akin, e.
“Sabi ko nga sa kanya, ‘Pagkatapos ng prom mo, uwi ka agad, ha?’”
FUTURE SUITORS. Tanggap na rin daw nilang mag-asawa ang katotohanang isa sa mga araw na ito ay may manliligaw na sa kanilang anak.
“Inevitable yun, e, na one of these days talagang mangyayari yun, e. Talagang may aakyat ng ligaw at mangyayari yun.
“Saka alam mo naman si Juliana, hindi sa pagyayabang, talagang may hitsura, e,” nakangiting pahayag ng 51-year-old actor-politician.
Tinanong ng PEP si Richard kung okay lang ba sa kanila ni Lucy sakaling gusto na ring pasukin ni Juliana ang pag-aartista.
Tugon niya, “Sabi ko sa kanya, ‘Kung ano yung gusto mong gawin ay susuportahan kita. Kung in case one day maisipan mo pumasok sa showbiz, it’s up to you.’
“I will be here to guide her.
“Kung ano yung gusto niya, support system lang kami ni Lucy. Pero mahiyain, e.
“Mukhang okay naman sa kanya, kaya lang nahihiya, lalo na pag maraming tao na sa harap niya.”