Namataan sa birthday celebration ni John Lloyd Cruz ang dati nitong girlfriend na si Angelica Panganiban.
Sa ilang videos at pictures na in-upload sa Instagram, makikita ang aktres bilang isa sa celebrity guests.
Ginanap ang birthday party ni John Lloyd sa isang work studio sa Cubao, Quezon City, nitong Sabado, June 25.
Ang aktuwal na ika-34 kaarawan ng Kapamilya actor ay June 24.
Dahil dito, lalong lumakas ang espekulasyong nagkabalikan sina John Lloyd at Angelica.
Bago ito, namataan ding magkasama ang dalawa nito lamang June 18, sa isang art fair sa Marco Polo Hotel, sa Ortigas.
Naiulat din ang pagpunta ni John Lloyd sa bahay ni Angelica noong Marso nang maghanda ang aktres para sa birthday ni Julia Montes.
Bago naman ito, namataan ding magkasama sina John Lloyd at Angelica sa isang art fair noong Pebrero.
Lumabas ang balita tungkol sa breakup nina John Lloyd at Angelica noong January 2016, pagkatapos ng tatlong taong relasyon.
Samantala, bukod kay Angelica, dumalo rin sa birthday celebration ni John Lloyd ang ibang aktres na na-link sa kanya, kagaya nina Bea Alonzo, Maja Salvador, at Ellen Adarna.
Naroon din sa party ang mga aktor na sina Vhong Navarro, Kean Cipriano, at Joel Torre.
ALDEN RICHARDS. Namataan din ang Kapuso actor na si Alden Richards sa party ni John Lloyd.
Sa Instagram video na ipinost ng stylist na si Rex Atienza, makikita ang pagkakamayan nina Alden at John Lloyd.
Makikita rin kung gaano inasikaso ni John Lloyd ang Kapuso star sa pagdating nito.
Sa video ring ito, mahahagip si Angelica habang kausap ang beteranong aktor na si Joel.