Kinumpirma ni Barbie Forteza na civil na sila ngayon ng ex-boyfriend niyang si Kiko Estrada.
Sa panayam ng PEP.ph (Philippine Entertainment Portal), ibinahagi ni Barbie ang pagkikita nila ni Kiko sa set ng GMA-7 game-comedy show na Celebrity Bluff ilang linggo na ang nakararaan.
Kuwento ng 20-year-old Kapuso actress, "Magkasama kami sa Celebrity Bluff! Bluffer ako, player siya.
"Doon kami nagkausap kasi magkaiba rin naman kami ng standby area.
"Pero okay naman kami. Wala namang violent reaction.
"Kahit naman yung mga tao, parang nalimutan na rin nila. So, okay naman!"
Ayon pa sa This Time I'll Be Sweeter lead star, naging maayos ang pag-uusap nila ni Kiko, 22, pero hindi na raw ito umabot sa kumustahan.
Pagpapatuloy niya, "Oo, hindi naman siya umabot sa nag-catch up pa kami sa text or whatever.
"Basta okay kami, hindi kami nag-isnaban, hindi kami nagsupladuhan.
"Nag-hi-hello kami, pero not to the point na chika-chika. Hindi rin kami nagkamustahan.
"Basta okay lang kami, civil lang."
Nakausap ng PEP.ph si Barbie pagkatapos ng bloggers' conference ng This Time I'll Be Sweeter sa 38 Valencia Events Place, Quezon City, noong Biyernes, November 3.
Unang nakuwento ni Kiko ang naging pagkikita nila ni Barbie sa PEP.ph, noong October 26, sa Magpakailanman set visit, sa Sampaloc, Manila.
Ayon kay Kiko, siya ang naunang lumapit kay Barbie.
Sabi niya, "I believe, in this situation, dapat gentleman yung mga lalaki."