Sa kabila ng pagkontra ng ilan sa pagkapanalo ni Miss Philippines Karen Ibasco sa Miss Earth 2017, kinilala ng Miss Colombia Juliana Franco ang Pinay beauty queen sa pamamagitan ng Instagram post ngayong Lunes, November 6.
Sa grand coronation ng Miss Earth 2017, sa MOA Arena noong Sabado ng gabi, November 4, sina Karen at Juliana ang natira sa entablado bago ideklara ang winner ng pageant.
Sa huli, ang kinatawan ng Pilipinas ang kinoronahang Miss Earth 2017, habang ang kandidata ng Colombia ang itinanghal na Miss Earth Water o 1st runner-up.
Si Karen ang ika-apat na Pinay na kinoronahang Miss Earth.
Nauna sa kanya sina Karla Henry noong 2008, Jamie Herrell noong 2014, at Angelia Ong noong 2015.
MISS COLOMBIA SPEAKS UP. Kung babasahin ang mga komento ng netizens sa social media, maraming Colombians ang nagalit sa pagkakahirang kay Karen bilang Miss Earth 2017.
Ayon sa ilang nagkomento, may kinikilingan at binayaran umano ang pagkapanalo ng 26-year-old Pinay university instructor.
Isang Instagram account (@reinashermosas), na may higit 60,000 followers, ang nag-post pa ng larawan ni Karen na sinusunog.
Ngunit tila nakahanap naman ng kakampi si Karen sa katauhan ng kandidata mula sa Colombia.
Sa kanyang Instagram post, binati ni Juliana si Karen sa pagkapanalo nito.
“Congrats to my beautiful Queen @karenibasco You Are a Truly Queen, thank you for everything and I really love you.”
Nagpasalamat din si Juliana sa mga kapwa niya Colombians, at maging sa mga Pinoy, sa pagmamahal na ibinigay ng mga ito sa kanya.
Sabi pa niya sa kanyang post, minsan ay hindi ibinibigay ng Panginoon kung ano ang gusto natin, kundi kung ano ang sa tingin ng Diyos ay nararapat para sa atin.
Hindi man niya nasungkit ang korona, tinawag pa rin ni Juliana na “PERFECT” kung ano ang kanyang natamo sa pageant.