Nagkabati na ang matalik na magkaibigan at dating na-link na sina Kakai Bautista at Ahron Villena.
Magkasamang nagbakasyon ang dalawa sa Tagaytay, kasama ang ilang pang mga kaibigan, kamakailan.
Sa isang video na in-upload sa Facebook noong November 6, mapapanood sina Ahron, 30, at Kakai, 39, na nagbibiruan.
Tinukso sila ng radio jock na si DJ Jhaiho kung nagkabalikan na ba sila.
Sagot ni Ahron, “Nagkabati, okay na naman.”
FRIENDZONED? Taong 2015 nang maugnay sina Kakai at Ahron dahil sa sweet photos na ipinu-post nila sa social media.
Bagamat patuloy silang inili-link noon, walang inamin ang dalawa na magkarelasyon sila.
Kaya naman marami ang nagulat nang i-friendzone ni Ahron si Kakai sa isang social media post noong March 2016, kasabay ang pagbura sa mga larawan nila sa kanyang Instagram account.
July 2017 nang sabihin ni Kakai sa isang interview na magkaibigan na silang muli ni Ahron, at sinabing tanggap niya si Ahron kung anuman ang pagkatao nito.
Minasama ito ni Ahron dahil sa tila pasaring ni Kakai tungkol sa kanyang sekswalidad.
Sa October 29 episode ng Gandang Gabi Vice, inamin ni Kakai na minahal at umasa siya kay Ahron.
Inamin din ng comedienne na may idine-date siya ngayong isang non-showbiz guy.