Nag-post kamakailan si Robin Padilla sa kanyang Instagram account ng mga larawan ng pagbibigay tulong nina Piolo Pascual at Direk Joyce Bernal para sa mga kababayan natin na naging biktima ng terorista sa Marawi City.
Si Robin pala ang naging tulay kung kaya’t nagkaroon ng telethon sa ASAP nung nakaraang Linggo, November 12, para sa Marawi victims.
Lahad niya, “Yung dalawa, ang istorya niyan, sa pagkakalahad nila, galing silang kumuha ng kanilang kinita sa Kita Kita."
Sina Piolo at Direk Joyce ay co-producers ng blockbuster film na Kita Kita, na tumabo ng mahigit 300 million pesos.
Patuloy na kuwento ni Robin, “Dahil dun, gusto nila akong makita, hinanap nila ako, pumunta sila dun sa shooting, sabi nila, 'May ibibigay kami sa iyo.'
“Sabi ko, 'Ano kaya yun?' Di ko alam.
“Nung dumating sila dun, binigyan nila ako ng tseke, one million galing kay Piolo, 500,000 galing kay Direk Joyce.
“Sabi nila, 'Alam namin mayroon kang programa sa Marawi, gusto namin na kagyat na makarating.'
“Sabi ko, 'Naku, maraming salamat, mayroon tayong ongoing doon na mga projects.'
“Siyempre, nagkukuwentuhan lang din kami, humingi sila ng background.
“E, alam mo naman ako, pagdating diyan, kahit ilang araw tayong mag-usap, e, kukuwentuhan kita.
“Di ko alam na nagmarkahan sa kanila lahat nung kuwento."
Dagdag niya, “Pagkaraan ng dalawang araw, tinatawagan ako ni Piolo saka ni Direk, 'Mayroon tayong meeting sa ABS.'
“Nagtatago nga ako sa ABS dahil inu-overload ako ng trabaho. Nawalan ako ng choice, pumunta ako.
“Aba, meeting pala yun, matinding meeting.
"Nandun lahat ng boss, and pati ABS-CBN Foundation nandun.
“Gusto nga raw nila ng telethon.
“Sabi ko, 'Telephone lang ang alam ko, di ko alam ang telethon, ano ba 'yan?'
“Yun daw pala yung tatawag yung tao, magpi-pledge.
“Sabi ko, 'Maganda ‘yan, malaking tulong ‘yan.' E, di sumuporta na ako.
“Siyempre pag ganyan, kailangan yung mga taong tutulong, mae-expose sa ground.
“Kasama ko yung [ABS-CBN] News and Current Affairs, pumunta kami ng Marawi, kinunan namin yung mga naganap dun hanggang sa makabalik kami."
AWARENESS CAMPAIGN. Ayon pa kay Robin, bukod sa perang nalikom sa fundraising, mas malaking tulong ang naidulot ng pagbibigay-linaw sa mga isyu na kadalasan ay nababahiran ng pulitika.
Sa tingin niya, mas mainam na nagkaroon na masinsinang diskusyon tungkol sa mga totoong nangyari sa Marawi.
Dagdag niya, “Ako naman, sa totoo lang, yung pera, secondary ‘yan.
“Ang kailangan ng mga Muslim, ng Maranaw sa ABS sa ngayon, e, yung inyong influence.
“Iparating sa mga tao, unang-una, yung nangyari sa Marawi, at di ito Islamic.
“Walang kinalaman ‘yan sa Islam.
“Pangalawa, yung malaman ng taong-bayan kung ano yung nangyari dun, kasi puro kuwento lang, e, at naiipit pa tayo sa pulitika.
“May kuwento si ganitong kulay, may kuwento si ganyang kulay, naliligaw ang tao.
“Sa pamamagitan ninyo at nagkaroon tayo ng no-holds barred, masayang-masaya ako dahil kanina yung talakayan lang namin sa telethon, no-holds barred.
“Ngayon lang ako naka-experience dito sa ating istasyon, Kapamilya, na di ako sinabihan ng di ko dapat sabihin.
“I have the freedom to say anything I like.
“Yun lang, para sa akin, tagumpay na yun, daig pa ninyo akong binigyan ng isang milyon at mapanood ng mga tagahanga ng mga artistang nakasama dito sa ASAP.
“Palagay ko, isang utang na loob na ‘yan. Sampung buhay ko man ang ibigay sa akin ng Panginoon, hindi ako makakabayad.
“Totoong istorya na ang ibinibigay ninyo, first-hand, at wala namang pinakamaganda medium dito kundi kayo, ang telebisyon.”