Nanawagan ang bagong kasal na si Ai-Ai delas Alas tungkol sa pagkawala ng kanyang Papal medal.
Sa pamamagitan ng Instagram, ipinaalam ng Comedy Queen na nahulog niya ang kanyang Papal medal sa mismong kasal nila ni Gerald Sibayan sa Christ The King church, noong Martes, December 12.
Pakiusap ni Ai-Ai sa kanyang IG post ngayong Huwebes, December 14: "Sa aking followers baka sakaling yung sumunod na kasal nung DEC 12, ay may kamag anak kayo na nakakita nitong PAPAL MEDAL KO.. suot ko nung kasal nahulog sa church sure ako na dun nahulog kasi yung huling picture ko sa chuch wala na siya... (CHRIST THE KING GREEN MEADOWS) baka may nakakita pls pakibalik lang po napaka importante nito saken pls."
Iginawad kay Ai-Ai ang Papal Award noong 2016 para sa kanyang "distinguished service to the church."
Itinuturing itong pinakamataas na award mula sa Santo Papa.