Sa kabila ng mga kontrobersiya noong 2017, matatag pa ring sinalubong ni John Lloyd Cruz ang bagong taon.
Sa isa sa mga unang post niya ngayong 2018, makikita ang video ng fireworks na kuha sa pagsalubong ng bagong taon.
Sa caption nito, sinabi ng aktor: “F*ck you 2017 you didnt break me. Salamat.”
Noong 2017 ay naging kontrobersiyal ang viral videos ni John Lloyd, kunsaan makikita siyang tila lasing habang kumakanta, sumasayaw, sumisiksik sa Gasul, at kung anu-ano pa ang ginagawa.
Ang mga ito ay kuha sa bakasyon nila ng Home Sweetie Home co-star niyang si Ellen Adarna at ilang pang mga kaibigan sa Bantayan Island, Cebu.
Ipinagtanggol si John Lloyd ni Johnny Manahan—na mas kilala bilang Mr. M—na siyang chairman emeritus ng Star Magic na namamahala ng career ni John Lloyd. Sinabi nitong napapalaki lang ang lahat, tulad ng simpleng pagbabakasyon ng artista, gayo't kung simpleng tao ang gumagawa nito, ni hindi ito pag-uusapan.
Kinalaunan ay humingi si John Lloyd ng paumanhin sa mga kabataang sumusubaybay sa kanya.
Aniya, “[D]iz iz mi lerning. very humbling but i do apologize to the little boys & girls. no regrets babies just life revealing its raw beauty.”
Ngunit tuloy-tuloy pa rin ang kontrobersyal na posts niya sa kanyang Instagram account.
Kasunod ng mga ito ay nagbigay na ng pahayag ang home network ni John Lloyd, ang ABS-CBN, na magi-indefinite leave ang aktor mula sa showbiz.
Bukod sa mga ito, naging laman din ng mga showbiz balita ang mga pangalan nina John Lloyd at Ellen dahil sa namumuong relasyon sa pagitan ng dalawa.
Sa showbiz, si John Lloyd ay kinikilalang matinee idol at premyadong aktor; si Ellen naman ay mas kinikilala bilang isang sexy star.
Bago matapos ang taon, ibinalita ng PEP.ph (Philippine Entertainment Portal) na buntis si Ellen.
Noong nakaraang Pasko, nag-post si Ellen ng larawan niya kasama si John Lloyd.